ali-baba koi sim-sim

alī-bābā

ye ujlat himmatoñ ko past kartī hai

mohabbat rāste meñ maut ko tajvīz kartī hai

havas terī ghane jañgal se choroñ ko

mirī bastī meñ le aa.ī

vo chālīs chor.....

bastī ke galī-kūchoñ meñ ab maqtal sajāte haiñ

alī-bābā

ḳhazāna paane kī ujlat

tire maazī kī mahrūmī kā

abtar shāḳhāsana hai

ye terī bad-nasībī se bhī bad-tar ik fasāna hai

nahīñ hai koī marjīnā, tirī achchhī kanīzoñ meñ

jo bastī ko bachā letī

salāmat hai na terā ghar

na merā dil

na ab darbār-e-shāhāna?

tujhe kyā hai?

havas terī rahe baaqī

ye bastī aag kī tasvīr ho jaa.e

agar ye raakh kā hī Dher ho jaa.e

tujhe kyā hai?

kanīzoñ ḳhāsa-dāroñ aur ġhulāmoñ se

tujhe fursat nahīñ miltī

vahī baġhdād jis ke sab galī-kūche

kabhī the mah-vashoñ ke

gul-ruḳhoñ ke ā.īna-ḳhāne

sitāre āsmāñ se jhuk ke jin ko roz takte the

jo aurāq-e-musavvar the

vahāñ par dhuul uḌtī hai

har ik jānib ajal kī hukmarānī hai

zamīñ par aag jaltī hai

zamīñ par aag jaltī hai

alī-bābā

ḳhazāna paane kī masarrat se ziyāda ab

aziyyat hai

ḳhazāna paane kī ujlat

havas terī

ghane jañgal se choroñ ko mirī bastī meñ le aa.ī

koī sim-sim

koī bhī ism-e-āzam ab

hamārī mushkileñ āsāñ nahīñ kartā

koī darmāñ nahīñ kartā

ali-baba

ye ujlat himmaton ko past karti hai

mohabbat raste mein maut ko tajwiz karti hai

hawas teri ghane jangal se choron ko

meri basti mein le aai

wo chaalis chor

basti ke gali-kuchon mein ab maqtal sajate hain

ali-baba

KHazana pane ki ujlat

tere mazi ki mahrumi ka

abtar shaKHasana hai

ye teri bad-nasibi se bhi bad-tar ek fasana hai

nahin hai koi marjina, teri achchhi kanizon mein

jo basti ko bacha leti

salamat hai na tera ghar

na mera dil

na ab darbar-e-shahana?

tujhe kya hai?

hawas teri rahe baqi

ye basti aag ki taswir ho jae

agar ye rakh ka hi Dher ho jae

tujhe kya hai?

kanizon KHasa-daron aur ghulamon se

tujhe fursat nahin milti

wahi baghdad jis ke sab gali-kuche

kabhi the mah-washon ke

gul-ruKHon ke aaina-KHane

sitare aasman se jhuk ke jin ko roz takte the

jo auraq-e-musawwar the

wahan par dhul uDti hai

har ek jaanib ajal ki hukmarani hai

zamin par aag jalti hai

zamin par aag jalti hai

ali-baba

KHazana pane ki masarrat se ziyaada ab

aziyyat hai

KHazana pane ki ujlat

hawas teri

ghane jangal se choron ko meri basti mein le aai

koi sim-sim

koi bhi ism-e-azam ab

hamari mushkilen aasan nahin karta

koi darman nahin karta