allah kare wo din aae ye mulk bhi ho aazad kahin

kahne ko to yuuñ kah dete haiñ bhārat ko agar gaaḌī kahiye

to hindū aur musalmāñ haiñ is gaaḌī hī ke do pahiye

yā mādar-e-hind kī āñkhoñ ke hindū muslim do taare haiñ

ho jaa.eñ agar ye shīr-o-shakar phir kyā hai vāre-nyāre haiñ

jab baat ye hai to kyuuñ donoñ ik ik ko girānā chāhte haiñ

kyuuñ qasr-e-qaumiyyat kī binā ye donoñ Dhānā chāhte haiñ

gaaḌī jo chalānā chāhte ho pahiya koī nā-hamvār na ho

gar diid kā lutf uThānā hai to aañkh koī be-kār na ho

kyā ham-sāyoñ se laḌ paḌnā qur.ān sharīf meñ aayā hai

kyā ham-sāyoñ se shar karnā vedoñ ne kahīñ batlāyā hai

phir nāhaq kyuuñ apnī quvvat ko ham din-rāt gañvāte haiñ

ḳhud laḌte haiñ dukh bharte haiñ jo ġhair haiñ un ko hañsāte haiñ

yuuñ aapas meñ laḌte laḌte kyā jāniye kyā ho jā.eñge

ik din aisā aa jā.egā ham donoñ fanā ho jā.eñge

achchhā ye baat batā.e koī ab tak laḌ kar kyā paayā hai

in roz ke qissoñ jhagḌoñ se kyā haath hamāre aayā hai

ham āzādī tak kho baiThe is aapas hī kī laḌā.ī se

bhārat kī naav Dubo baiThe is aapas hī kī laḌā.ī se

is aapas hī kī laḌā.ī se iflās se ham do chaar hue

is aapas hī kī laḌā.ī se ham aise zalīl-o-ḳhvār hue

daulat jo sharaf kā baa.is thī ab saat samundar paar ga.ī

is aapas hī kī laḌā.ī se ik baar nahīñ sau baar ga.ī

be-koshish kuchh bhī mil jaa.e is dahr meñ ye dastūr nahīñ

haañ dil se koshish kar Dāleñ to achchhe din kuchh duur nahīñ

ho merī tamannā par 'nayyar' qudrat kī taraf se saad kahīñ

allāh kare vo din aa.e ye mulk bhī ho āzād kahīñ

kahne ko to yun kah dete hain bhaarat ko agar gaDi kahiye

to hindu aur musalman hain is gaDi hi ke do pahiye

ya madar-e-hind ki aankhon ke hindu muslim do tare hain

ho jaen agar ye shir-o-shakar phir kya hai ware-nyare hain

jab baat ye hai to kyun donon ek ek ko girana chahte hain

kyun qasr-e-qaumiyyat ki bina ye donon Dhana chahte hain

gaDi jo chalana chahte ho pahiya koi na-hamwar na ho

gar did ka lutf uThana hai to aankh koi be-kar na ho

kya ham-sayon se laD paDna quran sharif mein aaya hai

kya ham-sayon se shar karna wedon ne kahin batlaya hai

phir nahaq kyun apni quwwat ko hum din-raat ganwate hain

KHud laDte hain dukh bharte hain jo ghair hain un ko hansate hain

yun aapas mein laDte laDte kya jaaniye kya ho jaenge

ek din aisa aa jaega hum donon fana ho jaenge

achchha ye baat batae koi ab tak laD kar kya paya hai

in roz ke qisson jhagDon se kya hath hamare aaya hai

hum aazadi tak kho baiThe is aapas hi ki laDai se

bhaarat ki naw Dubo baiThe is aapas hi ki laDai se

is aapas hi ki laDai se iflas se hum do chaar hue

is aapas hi ki laDai se hum aise zalil-o-KHwar hue

daulat jo sharaf ka bais thi ab sat samundar par gai

is aapas hi ki laDai se ek bar nahin sau bar gai

be-koshish kuchh bhi mil jae is dahr mein ye dastur nahin

han dil se koshish kar Dalen to achchhe din kuchh dur nahin

ho meri tamanna par 'nayyar' qudrat ki taraf se sad kahin

allah kare wo din aae ye mulk bhi ho aazad kahin