allama iqbaal

rind-e-mashriq tirī mastī meñ thī ḳhuddārī bhī

terī har baat meñ thī ek tarahdārī bhī

tere paimāne se chhalkī haiñ vo mai kī būñdeñ

jis kī ḳhushbū se mohabbat ke gulistāñ mahkeñ

terā mai-ḳhāna vo maktab hai jahāñ ahl-e-havas

pī ke ik jur'a-e-sahbā ko baneñ nek-nafas

zehn-o-afkār ke andāz ko badlā tū ne

aur kuuze meñ samundar ko samoyā tū ne

terī daulat se zamāne ko tab-o-tāb milī

fikr-o-ehsās ko ik jannat-e-shādāb milī

thā ‘ilāj-e-ġham-e-duniyā terī goyā.ī meñ

saare but toḌ diye ek hī añgḌā.ī meñ

ruḳh-e-urdu pe tirī fikr kā ik ġhāza hai

dil zamīñ kā hai tū āfāq kā āvāza hai

rind-e-mashriq teri masti mein thi KHuddari bhi

teri har baat mein thi ek tarahdari bhi

tere paimane se chhalki hain wo mai ki bunden

jis ki KHushbu se mohabbat ke gulistan mahken

tera mai-KHana wo maktab hai jahan ahl-e-hawas

pi ke ek jur'a-e-sahba ko banen nek-nafas

zehn-o-afkar ke andaz ko badla tu ne

aur kuze mein samundar ko samoya tu ne

teri daulat se zamane ko tab-o-tab mili

fikr-o-ehsas ko ek jannat-e-shadab mili

tha ‘ilaj-e-gham-e-duniya teri goyai mein

sare but toD diye ek hi angDai mein

ruKH-e-urdu pe teri fikr ka ek ghaza hai

dil zamin ka hai tu aafaq ka aawaza hai