amanat

maiñ ne tum se

faqat ek shaam māñgī thī

sukūn ke saath chand lamhāt

tumhāre saath guzārne ke liye

aur tum

vo shaam bhī na de sakī

yaqīn maano

tumhārī dī huī shaam

amānat rahtī mere paas

maiñ lauTā detā tumheñ

vo shaam vo amānat

jab bhī tum tanhā hotīñ

kisī shaam

haañ yaqīn maano

maiñ lauTā detā tumhārī vo shaam

tumhārī vo amānat

maiñ aaj bhī muntazir huuñ

us shaam kā

jab tum hoñgī

maiñ hūñgā

aur hamāre darmiyāñ

gar kuchh hoñgī

to hoñgī ḳhāmoshiyāñ sirf ḳhāmoshiyāñ

na tumhāre hoñTh kāñpeñge

na mere lab hileñge

na hogā koī fāsla

na hoñgī dūriyāñ

gar kuchh hoñgī

to hoñgī ḳhāmoshiyāñ

jo bahut kuchh kaheñgī kah jā.eñgī

āñkhoñ meñ

aur buneñgī alfāz mohabbat ke

ka.ī ka.ī rañgoñ meñ

aur mohabbat kā vo har rang

khil uThegā

tumhāre chhū bhar dene se

aur vo shaam

mere paas rah jā.egī

amānat kī tarah

kabhī tumheñ lauTāne ke liye

main ne tum se

faqat ek sham mangi thi

sukun ke sath chand lamhat

tumhaare sath guzarne ke liye

aur tum

wo sham bhi na de saki

yaqin mano

tumhaari di hui sham

amanat rahti mere pas

main lauTa deta tumhein

wo sham wo amanat

jab bhi tum tanha hotin

kisi sham

han yaqin mano

main lauTa deta tumhaari wo sham

tumhaari wo amanat

main aaj bhi muntazir hun

us sham ka

jab tum hongi

main hunga

aur hamare darmiyan

gar kuchh hongi

to hongi KHamoshiyan sirf KHamoshiyan

na tumhaare honTh kanpenge

na mere lab hilenge

na hoga koi fasla

na hongi duriyan

gar kuchh hongi

to hongi KHamoshiyan

jo bahut kuchh kahengi kah jaengi

aankhon mein

aur bunengi alfaz mohabbat ke

kai kai rangon mein

aur mohabbat ka wo har rang

khil uThega

tumhaare chhu bhar dene se

aur wo sham

mere pas rah jaegi

amanat ki tarah

kabhi tumhein lauTane ke liye