amanat

ye maazī jo mirī tanhā.iyoñ ke saath rahtā hai

ye ik nādān bachche kī tarah tanhā.ī ko

ishāra kartā hai ThoḌī pakaḌ kar aur kahtā hai

vo dekho gaañv ke siine pe sar rakkhe hue sarsoñ

tumhārī kam-sinī khelī hai jis kī god meñ barsoñ

nuqūsh-e-pā se ab tak har galī kī maañg raushan hai

abhī tak god phailā.e hue Dere kā āñgan hai

rasīlī jāmunoñ ke peḌ kī kamzor shāḳhoñ ne

tumhārī uñgliyoñ kā har nishāñ mahfūz rakkhā hai

laboñ par jhiil kī gahrā.iyoñ ke hai bas ik shikva

ki jab se tum ga.e ho koī bhī ham tak nahīñ pahuñchā

kināre jhiil ke vo peḌ ab tak muntazir sā hai

kab aaoge yahāñ kapḌe utroge nahāo.ge

ye maazī jo mirī tanhā.iyoñ ke saath rahtā hai

ye ik nādān bachche kī tarah tanhā.ī ko

ishāra kartā hai ThoḌī pakaḌ kar aur kahtā hai

vo dekho gaañv ke khaliyānoñ meñ soyā huā jaadū

nashīlī raat kī raanī vo lau detī huī ḳhushbū

diyoñ kā dhīmī dhīmī raushnī denā dhuāñ denā

shikasta jhoñpaḌoñ kā zindagī ko loriyāñ denā

khanaktī haiñ rasoī ghar meñ alhaḌ chūḌiyāñ ab tak

bharā kī poliyāñ laatī haiñ sar par būḌhiyāñ ab tak

ke kināre kachchī īñToñ se banā mandir

sulagte kanDoñ se uThtī dhueñ kī malgajī chādar

hare khetoñ kī meñDoñ par sulagte jism ke saa.e

larazte hoñTh ghabrā.ī huī sāñsoñ ke afsāne

lachaktī aam kī shāḳhoñ pe bal khaa.e hue jhūle

kisī kā bhāgnā ye kah ke koī hai hameñ chhū le

ye dekho zindagī kitnī hasīñ hai kitnī bholī hai

usī āġhosh meñ aa jaao jis meñ aañkh kholī hai

ye maazī jo mirī tanhā.iyoñ ke saath rahtā hai

ye kahtā hai ki maiñ guzrī huī bātoñ meñ kho jā.ūñ

tumhārī zulf se mahkī huī rātoñ meñ kho jā.ūñ

ise maiñ kaise samjhā.ūñ ki ab ye saañs kā Dorā

ik aisī dhaar kī talvār hai jis par guzarnā hai

mujhe aur zindagī ke zaḳhm ko Tāñke lagānā haiñ

ise maiñ kaise samjhā.ūñ ki ye maazī kī tasvīreñ

ab ik aisī amānat haiñ jise maiñ rakh nahīñ sakta

agar rakkhūñ to nākāra nikammā kah ke ye duniyā

mujhe Thokar lagā de aur ḳhud aage ko baḌh jaa.e

mirī pasmāndgī par har nazar uTThe taras khaa.e

mujhe murda ajā.ib-ghar kī aisī mūrtī samjhe

jo sab ko is liye pyārī hai ki kaafī purānī hai

ye maazī jo mirī tanhā.iyoñ ke saath rahtā hai

ise maiñ kaise samjhā.ūñ ki ye maazī kī tasvīreñ

ab ik aisī amānat haiñ jise maiñ rakh nahīñ sakta

ye mazi jo meri tanhaiyon ke sath rahta hai

ye ek nadan bachche ki tarah tanhai ko

ishaara karta hai ThoDi pakaD kar aur kahta hai

wo dekho ganw ke sine pe sar rakkhe hue sarson

tumhaari kam-sini kheli hai jis ki god mein barson

nuqush-e-pa se ab tak har gali ki mang raushan hai

abhi tak god phailae hue Dere ka aangan hai

rasili jamunon ke peD ki kamzor shaKHon ne

tumhaari ungliyon ka har nishan mahfuz rakkha hai

labon par jhil ki gahraiyon ke hai bas ek shikwa

ki jab se tum gae ho koi bhi hum tak nahin pahuncha

kinare jhil ke wo peD ab tak muntazir sa hai

kab aaoge yahan kapDe utroge nahaoge

ye mazi jo meri tanhaiyon ke sath rahta hai

ye ek nadan bachche ki tarah tanhai ko

ishaara karta hai ThoDi pakaD kar aur kahta hai

wo dekho ganw ke khaliyanon mein soya hua jadu

nashili raat ki rani wo lau deti hui KHushbu

diyon ka dhimi dhimi raushni dena dhuan dena

shikasta jhonpaDon ka zindagi ko loriyan dena

khanakti hain rasoi ghar mein alhaD chuDiyan ab tak

bhara ki poliyan lati hain sar par buDhiyan ab tak

ke kinare kachchi inTon se bana mandir

sulagte kanDon se uThti dhuen ki malgaji chadar

hare kheton ki meinDon par sulagte jism ke sae

larazte honTh ghabrai hui sanson ke afsane

lachakti aam ki shaKHon pe bal khae hue jhule

kisi ka bhagna ye kah ke koi hai hamein chhu le

ye dekho zindagi kitni hasin hai kitni bholi hai

usi aaghosh mein aa jao jis mein aankh kholi hai

ye mazi jo meri tanhaiyon ke sath rahta hai

ye kahta hai ki main guzri hui baaton mein kho jaun

tumhaari zulf se mahki hui raaton mein kho jaun

ise main kaise samjhaun ki ab ye sans ka Dora

ek aisi dhaar ki talwar hai jis par guzarna hai

mujhe aur zindagi ke zaKHm ko Tanke lagana hain

ise main kaise samjhaun ki ye mazi ki taswiren

ab ek aisi amanat hain jise main rakh nahin sakta

agar rakkhun to nakara nikamma kah ke ye duniya

mujhe Thokar laga de aur KHud aage ko baDh jae

meri pasmandgi par har nazar uTThe taras khae

mujhe murda ajaib-ghar ki aisi murti samjhe

jo sab ko is liye pyari hai ki kafi purani hai

ye mazi jo meri tanhaiyon ke sath rahta hai

ise main kaise samjhaun ki ye mazi ki taswiren

ab ek aisi amanat hain jise main rakh nahin sakta