amar jot

añdherā har taraf chhāyā huā hai

añdherā hī azal hai aur añdherā hī abad kī jot hai shāyad

isī tārīk chādar kī tahoñ meñ

adam ke ḳhvāb se tārīḳh jaagī

isī tārīk chādar meñ tamaddun muskurāyā khilkhilāyā jagmagāyā

yahī tārīk chādar ḳhāvar-e-tahzīb kā mashriq banī āḳhir

yahī tārīk chādar oḌh kar haivāniyat ne ruup dhāran kar liye lākhoñ

isī tārīk chādar meñ simaT kar gum huī hastī

yahī mashriq yahī maġhrib

añdherā hī azal hai aur añdherā hī abad kī jot hai shāyad

añdhere kī isī dīvār-e-chīñ ko

kabhī 'suqrāt' kī hikmat ne Dhāyā

kabhī iisā ke ḳhūn-e-garm-o-tāza ne kiyā rangīñ

kabhī gautam kī mausīqī ke sāyoñ ne ise gherā

kabhī zarb-e-mohammad ne kiyā TukḌe

husain ibn-e-alī ke ḳhūn-e-nāhaq ke thapeḌoñ se kabhī kāñpī kabhī larzī

fazā meñ ek chingārī sī taḌpī

aur us ke baad us ke baad

chhā.ī phir vahī manhūs tārīkī vahī manhūs tārīkī

añdherā hī azal hai aur añdherā hī abad kī jot hai shāyad

añdhere kī jabīn-e-āhanī se

ye kaisī jot phūTī muskurā.ī jagmagā.ī

ye kis kī muskurāhaT se banī insāniyat gulshan

ye kis ne hind kī tārīk duniyā ko kiyā raushan

dukhī duniyā sitāroñ se banī dul.han

zamīr-e-zindagī meñ karvaTeñ lene lagī ik mustaqil dhaḌkan

varaq tārīḳh ne tezī se ulTe

taġhayyur le ke sāz-o-barg-e-ta.amīr-e-jahāñ aaya

banī aadam kī duniyā ko sajāne

dil-e-suqrāt-o-īsā jhuum uTThe

jabīn-e-budh se niklī ik na.ī jot

añdhere hī se phūTā ik nayā saut

añdherā apnī hastī kho rahā hai

añdherā nuur meñ hal ho rahā hai

na.e dīpak kī jotī muskurā.ī

jahāñ ko kar diyā raushan

jahāñ ko mānavtā ko zindagī ko qalb-o-jāñ ko kar diyā raushan

siyah-ḳhāne meñ apnā jaal le aa.e na.e ḳhāke

na.ī duniyā banāne kī tamanna ke na.e ḳhāke

ki phir zālim añdherā jang-jū hāsid añdherā

liye tārīkiyoñ ke jaal aaya

nigār-e-amn ke dīpak pe TuuTā

kabhī kirnoñ kabhī dīpak ko luuTā

zamīñ se āsmāñ tak mauj-e-ḳhūñ hai

abhī tak aadmī said-e-zabūñ hai

añdherā hī azal hai aur añdherā hī abad kī jot hai shāyad

agar suqrāt kā dīpak hai raushan

sirāj-e-ibn-e-mariyam gar abad tak bujh nahīñ saktā

koī jhoñkā agar sham.a-e-shahīd-e-karbalā ko chhū nahīñ saktā

to ai tārīk duniyā to ai māyūs insāñ

bujhā saktī nahīñ hai koī āñdhī

yuñhī raushan rahegī sham.a-e-gāñdhī

andhera har taraf chhaya hua hai

andhera hi azal hai aur andhera hi abad ki jot hai shayad

isi tarik chadar ki tahon mein

adam ke KHwab se tariKH jagi

isi tarik chadar mein tamaddun muskuraya khilkhilaya jagmagaya

yahi tarik chadar KHawar-e-tahzib ka mashriq bani aaKHir

yahi tarik chadar oDh kar haiwaniyat ne rup dhaaran kar liye lakhon

isi tarik chadar mein simaT kar gum hui hasti

yahi mashriq yahi maghrib

andhera hi azal hai aur andhera hi abad ki jot hai shayad

andhere ki isi diwar-e-chin ko

kabhi 'suqraat' ki hikmat ne Dhaya

kabhi isa ke KHun-e-garm-o-taza ne kiya rangin

kabhi gautam ki mausiqi ke sayon ne ise ghera

kabhi zarb-e-mohammad ne kiya TukDe

husain ibn-e-ali ke KHun-e-nahaq ke thapeDon se kabhi kanpi kabhi larzi

faza mein ek chingari si taDpi

aur us ke baad us ke baad

chhai phir wahi manhus tariki wahi manhus tariki

andhera hi azal hai aur andhera hi abad ki jot hai shayad

andhere ki jabin-e-ahani se

ye kaisi jot phuTi muskurai jagmagai

ye kis ki muskurahaT se bani insaniyat gulshan

ye kis ne hind ki tarik duniya ko kiya raushan

dukhi duniya sitaron se bani dulhan

zamir-e-zindagi mein karwaTen lene lagi ek mustaqil dhaDkan

waraq tariKH ne tezi se ulTe

taghayyur le ke saz-o-barg-e-tamir-e-jahan aaya

bani aadam ki duniya ko sajaane

dil-e-suqraat-o-isa jhum uTThe

jabin-e-budh se nikli ek nai jot

andhere hi se phuTa ek naya saut

andhera apni hasti kho raha hai

andhera nur mein hal ho raha hai

nae dipak ki joti muskurai

jahan ko kar diya raushan

jahan ko manawta ko zindagi ko qalb-o-jaan ko kar diya raushan

siyah-KHane mein apna jal le aae nae KHake

nai duniya banane ki tamanna ke nae KHake

ki phir zalim andhera jang-ju hasid andhera

liye tarikiyon ke jal aaya

nigar-e-amn ke dipak pe TuTa

kabhi kirnon kabhi dipak ko luTa

zamin se aasman tak mauj-e-KHun hai

abhi tak aadmi said-e-zabun hai

andhera hi azal hai aur andhera hi abad ki jot hai shayad

agar suqraat ka dipak hai raushan

siraj-e-ibn-e-mariyam gar abad tak bujh nahin sakta

koi jhonka agar shama-e-shahid-e-karbala ko chhu nahin sakta

to ai tarik duniya to ai mayus insan

bujha sakti nahin hai koi aandhi

yunhi raushan rahegi shama-e-gandhi