ambulance

jo mujh ko laa.ī thī sukūn-gāh meñ

vo ek thī

sapīd, sirf ek, us ke pahluoñ, jabīn aur pusht par

salīb ke nishān the

maiñ chuur chuur ik aziim ghaao thā

vo mujh ko dast-e-mehrbāñ meñ sauñp kar

chalī ga.ī to maiñ ġhunūdgī kī be-karāñ muhīb dhund meñ bhaTak gayā

har ek rah-guzar pe gāḌiyoñ basoñ kā kārvāñ umañD paḌā

ajiib inqalāb thā mirī nazar ke sāmne

vo ek pal meñ sab sapīd ho ga.iiñ

sapīd sab sapīd, un ke pahluoñ, jabīn aur pusht par

salīb ke nishān daf.atan ubhar ke aa ga.e

alam-nasīb un ke be-amāñ makīñ

mire hī ham-nafas vafā-shi.ār vo aziiz the

jo sādgī se koī mushtahar fareb khā ga.e

kisī muhīb jañg bhuuk qaht yā vabā kī zad meñ aa ga.e

jo mujh ko lai thi sukun-gah mein

wo ek thi

sapid, sirf ek, us ke pahluon, jabin aur pusht par

salib ke nishan the

main chur chur ek azim ghao tha

wo mujh ko dast-e-mehrban mein saunp kar

chali gai to main ghunudgi ki be-karan muhib dhund mein bhaTak gaya

har ek rah-guzar pe gaDiyon bason ka karwan umanD paDa

ajib inqalab tha meri nazar ke samne

wo ek pal mein sab sapid ho gain

sapid sab sapid, un ke pahluon, jabin aur pusht par

salib ke nishan dafatan ubhar ke aa gae

alam-nasib un ke be-aman makin

mere hi ham-nafas wafa-shiar wo aziz the

jo sadgi se koi mushtahar fareb kha gae

kisi muhib jang bhuk qaht ya waba ki zad mein aa gae