amir-KHusraw

ek tahzīb-e-mushtarak kā amiiñ

fikr-o-fan kī latāfatoñ kā shu.ūr

jazb-e-dil kā mizāj-dāñ fankār

rūh-e-ehsās garmī-e-raftār

parda-e-sāz harf-e-mausīqī

tund rāgoñ kā nāchtā sho.ala

narm gītoñ kī ajnabī ḳhushbū

vaqt kī lahr-lahr kā mudrik

jāgte mausamoñ kā ā.īna

apne lamhāt-e-asr kī tafsīr

yaanī ranj o nashāt kī tasvīr

zindagī kā jamāl-e-sho.ala-sifat

bāda-e-āgahī se mast-o-alast

bazm-e-insāniyat kā ek charāġh

falsafī kī nigāh-e-bā-maqsad

ārzūoñ kā dil-nashīñ unvāñ

ek majmūa ilm-o-dānish kā

ek sūfī-mizāj ahl-e-suḳhan

daulat-e-naġhma ek mausīqār

yaanī 'ḳhusro' vo sher kā me.aar

jis kī fikroñ se ruuh ho bedār

vaqt kī sarhadeñ phalāñg ke aaj

ham meñ phir aa gayā hai vo fankār

ek tahzib-e-mushtarak ka amin

fikr-o-fan ki latafaton ka shuur

jazb-e-dil ka mizaj-dan fankar

ruh-e-ehsas garmi-e-raftar

parda-e-saz harf-e-mausiqi

tund ragon ka nachta shoala

narm giton ki ajnabi KHushbu

waqt ki lahr-lahr ka mudrik

jagte mausamon ka aaina

apne lamhat-e-asr ki tafsir

yani ranj o nashat ki taswir

zindagi ka jamal-e-shoala-sifat

baada-e-agahi se mast-o-alast

bazm-e-insaniyat ka ek charagh

falsafi ki nigah-e-ba-maqsad

aarzuon ka dil-nashin unwan

ek majmua ilm-o-danish ka

ek sufi-mizaj ahl-e-suKHan

daulat-e-naghma ek mausiqar

yani 'KHusro' wo sher ka mear

jis ki fikron se ruh ho bedar

waqt ki sarhaden phalang ke aaj

hum mein phir aa gaya hai wo fankar