amiron ki duniya

kisī kī tabī.at meñ pindār-e-mastī

kisī ko ġhurūr-e-javānī kī mastī

koī mast mai-ḳhāna-e-ḳhud-parastī

amīroñ kī duniyā takabbur kī pastī

fareboñ ke saa.e meñ Derā hai un kā

gunāhoñ ke ghar meñ baserā hai un kā

koī apne zor-e-hukūmat pe nāzāñ

koī māl-o-daulat kī kasrat pe nāzāñ

koī apne aivāñ kī rif.at pe nāzāñ

koī hashmat-o-jāh-o-sarvat pe nāzāñ

vo nasha chaḌhā hai ki bhūlā ḳhudā bhī

ye sunte nahīñ bekasoñ kī duā bhī

jo nāyāb shai ho use DhūñD laa.eñ

jo marġhūb-e-ḳhātir ho vo chiiz khā.eñ

jo garmī ko chāheñ to sardī banā.eñ

uḌā.īñ pahāḌoñ kī ThanDī havā.eñ

zamāne meñ chaltī agar hai to un kī

yahāñ daal galtī agar hai to un kī

hai dushvār un ko bulandī na pastī

amīroñ kī duniyā meñ mahñgī bhī sastī

na dekhī unhoñ ne kabhī faaqa mastī

ye haiñ be-niyāz-e-ġham-e-tañg-dastī

ye muflis kī mushkil ko kyā jānte haiñ

ye nādār ko ḳhaak pahchānte haiñ

guzartī hai shab jo havas-rāniyoñ meñ

to kaTtā hai din fitna-sāmāniyoñ meñ

ye haiñ mast apnī tan-āsāniyoñ meñ

zamāna hai in se pareshāniyoñ meñ

ġharīboñ ke haq meñ balā banñe vaale

yatīmoñ ke haq meñ qazā banñe vaale

zamāna ho zach jis se vo chaal kar deñ

jo mumkin ho duniyā kā pāmāl kar deñ

agar ho sake sab ko kañgāl kar deñ

jo ḳhush-hāl hoñ un ko bad-hāl kar deñ

ġharaz un ke dil haiñ mohabbat se ḳhālī

uḳhuvvat se ḳhālī ināyat se ḳhālī

jo bole koī to zabān kaaT Dāleñ

jo dekhe koī us kī āñkheñ nikāleñ

nahīñ un se mumkin kisī ko sambhāleñ

koī mar rahā ho to us ko bachā leñ

magar shukr hai 'arsh' fazl-e-ḳhudā kā

vo ḳhallāq hāfiz hai har be-navā kā

kisi ki tabiat mein pindar-e-masti

kisi ko ghurur-e-jawani ki masti

koi mast mai-KHana-e-KHud-parasti

amiron ki duniya takabbur ki pasti

farebon ke sae mein Dera hai un ka

gunahon ke ghar mein basera hai un ka

koi apne zor-e-hukumat pe nazan

koi mal-o-daulat ki kasrat pe nazan

koi apne aiwan ki rifat pe nazan

koi hashmat-o-jah-o-sarwat pe nazan

wo nasha chaDha hai ki bhula KHuda bhi

ye sunte nahin bekason ki dua bhi

jo nayab shai ho use DhunD laen

jo marghub-e-KHatir ho wo chiz khaen

jo garmi ko chahen to sardi banaen

uDain pahaDon ki ThanDi hawaen

zamane mein chalti agar hai to un ki

yahan dal galti agar hai to un ki

hai dushwar un ko bulandi na pasti

amiron ki duniya mein mahngi bhi sasti

na dekhi unhon ne kabhi faqa masti

ye hain be-niyaz-e-gham-e-tang-dasti

ye muflis ki mushkil ko kya jaante hain

ye nadar ko KHak pahchante hain

guzarti hai shab jo hawas-raniyon mein

to kaTta hai din fitna-samaniyon mein

ye hain mast apni tan-asaniyon mein

zamana hai in se pareshaniyon mein

gharibon ke haq mein bala banne wale

yatimon ke haq mein qaza banne wale

zamana ho zach jis se wo chaal kar den

jo mumkin ho duniya ka pamal kar den

agar ho sake sab ko kangal kar den

jo KHush-haal hon un ko bad-haal kar den

gharaz un ke dil hain mohabbat se KHali

uKHuwwat se KHali inayat se KHali

jo bole koi to zaban kaT Dalen

jo dekhe koi us ki aankhen nikalen

nahin un se mumkin kisi ko sambhaalen

koi mar raha ho to us ko bacha len

magar shukr hai 'arsh' fazl-e-KHuda ka

wo KHallaq hafiz hai har be-nawa ka