an-dekhi zamin par

suno

ġhaur se suno

ek sogvār sī dastak tumhāre dar pe kab se ho rahī hai

jānte ho

ye sūiyoñ kī Tak Tak tumheñ dhīre dhīre be-bas kar rahī hai

guzarne vaalā koī pal bhī tumhārā nahīñ

mahsūs karo un hāthoñ kī jumbish ko

jo tumhārī giraft se āzād ho rahe haiñ

kaise rok sakoge us ghaḌī ko

jo maazī ko kuchal kar tumhāre mustaqbil par hañs rahī ho

bahut sī ummīdeñ aur ḳhvāb tumhārī āñkhoñ meñ jāñkanī ban ke Thahre ga.e haiñ

āñkheñ jin meñ ab koī manzar nahīñ

vahshat zada vīrāniyāñ tumhāre bistar ke gird lipaT ga.ī haiñ

is ḳhālī aur udaas fazā meñ

kabhī raat kī raanī kī ḳhushbū se mahrūm raat aatī hai

aur kabhī koī sub.h aisī bhī hotī hai

jab sūraj-mukhī tak sūraj kī koī kiran nahīñ pahuñchtī

tab sirf

zavāl kā phuul khiltā hai

suno

ghaur se suno

ek sogwar si dastak tumhaare dar pe kab se ho rahi hai

jaante ho

ye suiyon ki Tak Tak tumhein dhire dhire be-bas kar rahi hai

guzarne wala koi pal bhi tumhaara nahin

mahsus karo un hathon ki jumbish ko

jo tumhaari giraft se aazad ho rahe hain

kaise rok sakoge us ghaDi ko

jo mazi ko kuchal kar tumhaare mustaqbil par hans rahi ho

bahut si ummiden aur KHwab tumhaari aankhon mein jaankani ban ke Thahre gae hain

aankhen jin mein ab koi manzar nahin

wahshat zada viraniyan tumhaare bistar ke gird lipaT gai hain

is KHali aur udas faza mein

kabhi raat ki rani ki KHushbu se mahrum raat aati hai

aur kabhi koi subh aisi bhi hoti hai

jab suraj-mukhi tak suraj ki koi kiran nahin pahunchti

tab sirf

zawal ka phul khilta hai