an-kahi baaten

maiñ us kī an-kahī bāteñ samajhtā huuñ

samajhtā huuñ vo sab bāteñ

jinheñ alfāz kā jaama pahan kar

nutq se bāhar nikalne kā koī rasta nahīñ miltā

samajhtā huuñ vo sab dukh bhī

jo dil ke har nihāñ-ḳhāne kī tārīkī meñ

chup sādhe khaḌe haiñ

magar jab bhī vo tanhā.ī ke ik namnāk lamhe meñ

udāsī kī hazīñ chādar lapeTe

ek gahrī soch meñ Duubī huī

chup-chāp baiThī ho

to ruḳhsāroñ kī būḌhī jhurriyāñ

māthe kī saarī sāl-ḳhūrda silvaTeñ

mujh se sarīhan baat kartī haiñ

vo bāteñ dukh-bhare qisse

jo duniyā kī sabhī maa.eñ vatan se duur baiThe apne bachchoñ se chhupā kar

dil meñ rakhtī haiñ

chhupā.e laakh vo lekin

takallum se bharī us kī ḳhamoshī meñ nihāñ

vo an-kahī bāteñ

utartī haiñ mire siine meñ chupke se

Dhalaktī haiñ mirī āñkhoñ se ashkoñ kī ravānī meñ

maiñ bad-qismat huuñ bebas huuñ

faqat dāman bhigo saktā huuñ

aur pardes meñ baiThā huā

kuchh kar nahīñ saktā

main us ki an-kahi baaten samajhta hun

samajhta hun wo sab baaten

jinhen alfaz ka jama pahan kar

nutq se bahar nikalne ka koi rasta nahin milta

samajhta hun wo sab dukh bhi

jo dil ke har nihan-KHane ki tariki mein

chup sadhe khaDe hain

magar jab bhi wo tanhai ke ek namnak lamhe mein

udasi ki hazin chadar lapeTe

ek gahri soch mein Dubi hui

chup-chap baiThi ho

to ruKHsaron ki buDhi jhurriyan

mathe ki sari sal-KHurda silwaTen

mujh se sarihan baat karti hain

wo baaten dukh-bhare qisse

jo duniya ki sabhi maen watan se dur baiThe apne bachchon se chhupa kar

dil mein rakhti hain

chhupae lakh wo lekin

takallum se bhari us ki KHamoshi mein nihan

wo an-kahi baaten

utarti hain mere sine mein chupke se

Dhalakti hain meri aankhon se ashkon ki rawani mein

main bad-qismat hun bebas hun

faqat daman bhigo sakta hun

aur pardes mein baiTha hua

kuchh kar nahin sakta