ان کہی کویتا

وہ کویتا

ابھی ہے مرے ذہن کی دھند میں جو

ہزاروں دلوں سے نچوڑی ہوئی سادگی

اور ہونٹوں سے چھینے ہوئے

قہقہوں میں رچی ہے

مگر کوئی کیسے لکھے وہ کویتا

کہ اب انگلیوں سے ٹپکنے لگا ہے لہو

اور زباں

منجمد خون کے ذائقے سے تڑخنے لگی ہے

یہ ممکن ہے

وہ خون میرا ہو یا ہو کسی اجنبی کا

مگر اس سے کیا خون تو خون ہی ہے

کسی فلسفی سوچ کی تال پر

ڈولتی گردنیں کہہ رہی ہیں

ادھر کالی کالی فصیلوں کے پیچھے بڑی روشنی ہے

مگر جانے کیوں

روشنی کی کوئی نئی آیت

اب تک مری آنکھ کی پتلیوں کے رسولوں پہ اتری نہیں

تو شاید میں آسیب ہوں

دشت احساس کا اور بھٹکتا ہوں

جیسے کوئی روح پیاسی