an-kahi kawita

vo kavitā

abhī hai mire zehn kī dhund meñ jo

hazāroñ diloñ se nichoḌī huī sādgī

aur hoñToñ se chhīne hue

qahqahoñ meñ rachī hai

magar koī kaise likhe vo kavitā

ki ab uñgliyoñ se Tapakne lagā hai lahū

aur zabāñ

munjamid ḳhuun ke zā.iqe se taḌaḳhne lagī hai

ye mumkin hai

vo ḳhuun merā ho yā ho kisī ajnabī kā

magar is se kyā ḳhuun to ḳhuun hī hai

kisī falsafī soch kī taal par

Doltī gardaneñ kah rahī haiñ

udhar kaalī kaalī fasīloñ ke pīchhe baḌī raushnī hai

magar jaane kyoñ

raushnī kī koī na.ī aayat

ab tak mirī aañkh kī putliyoñ ke rasūloñ pe utrī nahīñ

to shāyad maiñ aaseb huuñ

dasht-e-ehsās kā aur bhaTaktā huuñ

jaise koī ruuh piyāsī

wo kawita

abhi hai mere zehn ki dhund mein jo

hazaron dilon se nichoDi hui sadgi

aur honTon se chhine hue

qahqahon mein rachi hai

magar koi kaise likhe wo kawita

ki ab ungliyon se Tapakne laga hai lahu

aur zaban

munjamid KHun ke zaiqe se taDaKHne lagi hai

ye mumkin hai

wo KHun mera ho ya ho kisi ajnabi ka

magar is se kya KHun to KHun hi hai

kisi falsafi soch ki tal par

Dolti gardanen kah rahi hain

udhar kali kali fasilon ke pichhe baDi raushni hai

magar jaane kyon

raushni ki koi nai aayat

ab tak meri aankh ki putliyon ke rasulon pe utri nahin

to shayad main aaseb hun

dasht-e-ehsas ka aur bhaTakta hun

jaise koi ruh piyasi