ana aur mohabbat

ye maiñ ki mujh se chhin gayā hai sar-basar

vo kaun hai ki jis kī dastaras meñ aa ke maiñ mirā nahīñ rahā

mujhe to maiñ tamām kā.enāt se aziiz thā

mirī anā kī saltanat vasī.a thī ariiz thī aur us kā narcissus thā maiñ

vo saltanat jahāñ pe sirf maiñ thā merā aks thā

aur is ke mā-sivā nafī kā raqs thā

maiñ apnī zaat par farefta rahā

maiñ apne aap hī kā shefta rahā

na jaane kitne mehr-o-mah kī tābisheñ mirī tajalliyoñ kī zad pe aa ke ḳhaak ho ga.iiñ

mirī nazar ko koī bhī mire sivā jachā nahīñ

magar vo ek shaam ajab tilism-rang-shām thī

fusūñ-tarāz sāhira sarāpā rashk-e-jām thī

vo sāhira ki lashkar-e-jamāl-e-bā-kamāl us ke saath thā

vo sāhira ki qatl-e-ām ke tamām aslahoñ se lais thī

balā kī jañg chhiḌ ga.ī

mirī anā thī ik taraf aur us kā husn ik taraf

vo yak-ba-yak shadīd yūrisheñ huiiñ

mire sabhī havās us ke yarġhamāl ho ga.e

tamām ḳhud-pasandiyoñ kā taḳht-o-tāj luT gayā

mirī anā kī saltanat tamām ujaḌ ke rah ga.ī

ye main ki mujh se chhin gaya hai sar-basar

wo kaun hai ki jis ki dastaras mein aa ke main mera nahin raha

mujhe to main tamam kaenat se aziz tha

meri ana ki saltanat wasia thi ariz thi aur us ka narcissus tha main

wo saltanat jahan pe sirf main tha mera aks tha

aur is ke ma-siwa nafi ka raqs tha

main apni zat par farefta raha

main apne aap hi ka shefta raha

na jaane kitne mehr-o-mah ki tabishen meri tajalliyon ki zad pe aa ke KHak ho gain

meri nazar ko koi bhi mere siwa jacha nahin

magar wo ek sham ajab tilism-rang-sham thi

fusun-taraaz sahira sarapa rashk-e-jam thi

wo sahira ki lashkar-e-jamal-e-ba-kamal us ke sath tha

wo sahira ki qatl-e-am ke tamam aslahon se lais thi

bala ki jang chhiD gai

meri ana thi ek taraf aur us ka husn ek taraf

wo yak-ba-yak shadid yurishen huin

mere sabhi hawas us ke yarghamal ho gae

tamam KHud-pasandiyon ka taKHt-o-taj luT gaya

meri ana ki saltanat tamam ujaD ke rah gai