anar-kali

tere ġham meñ kitnā nāzuk ho gayā hai dil ki ab

is bhare bāzār meñ

har sadā ik ajnabī ehsās kā ā.īna hai

aaj tere ġham se fāriġh ho ke maiñ

bah rahā huuñ lazzat-e-iz.hār ke sailāb meñ

laḌkhaḌāte reñgte lañgḌāte hañste bolte

lafz aur un kā dhuāñ ḳhushbū chamak

chal rahe haiñ mil ke be-āhañg āvāzoñ ke rañg

ajnabī hoñToñ ke lafz

ārzuoñ ke ġhubāre hasratoñ kī titliyāñ

chār-sū uḌtī haiñ maiñ ḳhāmosh huuñ

guftugū ke dā.eroñ meñ phail kar

rañg bhartā jā rahā hai un tamannāoñ kā ḳhuuñ

jin ke lafzoñ ne zabāñ dī sunñe vāloñ kā ḳhayāl

un meñ Duubā jā rahā hai bolte lafzoñ kā sahar

us ko apne daam meñ laatā huā

phail kar aatā hai mujh tak pech-o-ḳham khātā huā

aur maiñ

us kī kaifiyat kā ġhāza apne chehre par lagā.e

ik na.ī āvāz ke saa.e meñ huuñ

chāhtā huuñ band āñkhoñ se maiñ us sailāb meñ

kuud jā.ūñ aur nazzāra karūñ

apne kānoñ se diloñ ke tarjumāñ alfāz kā

sūrat goyā se baḌh kar hai suḳhan-andāz kā

nuqra.ī āvāz meñ lafzoñ kā nuur

apne hamrāhī ke dil par naġhma-bār

jaise shabnam dāman-e-gul par gire be-iḳhtiyār

is sadā meñ harf haiñ yā mom ke aañsū haiñ jo

sham.a ke pahlū meñ girte jā rahe haiñ kyā karūñ

āñkheñ kholūñ aur us bachchī kī sūrat dekh luuñ

us sadā meñ naḳhvat-e-zar kā jalāl

jaise parbat se gire jharnā koī

sañg-e-asvad kī chaTāneñ toḌnā

dost ham-sin ham-suḳhan

jin ke saada saaf se andāz meñ

koī maazī koī mustaqbil nahīñ

haal ke lamhāt rañgīñ qahqahe phūloñ ke haar

aur us āvāz meñ

ziist kī mahrūmiyāñ zanjīr dar zanjīr haiñ

kholte lafzoñ kī bhaap

dil ke ā.īne ko dhuñdlātī hai haath

ḳhud-baḳhud baḌhtā hai apnī jeb kī jānib magar

ye gadā bhī to nahīñ

aur us āvāz meñ hirs-o-havas kā zahr hai

lafz tīroñ kī tarah uḌte hue

sīna-e-ehsās meñ paivast hote haiñ magar

dil se nafrat ke sivā koī sadā uThtī nahīñ

aur ye āvāz merī dost-dār dil tirī āvāz hai

kitne naġhme gūñjte haiñ kitnī rātoñ kā ḳhumār

kitne rañgoñ kā talātum kitne phūloñ kī hañsī

sarsarāte reshmīñ malbūs ke mānind ye terī sadā

Dhāñptī hai garmi-e-āġhosh se parvāz meñ

kho ga.ī haiñ saarī āvāzeñ tirī āvāz meñ

tere gham mein kitna nazuk ho gaya hai dil ki ab

is bhare bazar mein

har sada ek ajnabi ehsas ka aaina hai

aaj tere gham se farigh ho ke main

bah raha hun lazzat-e-izhaar ke sailab mein

laDkhaDate rengte langDate hanste bolte

lafz aur un ka dhuan KHushbu chamak

chal rahe hain mil ke be-ahang aawazon ke rang

ajnabi honTon ke lafz

aarzuon ke ghubare hasraton ki titliyan

chaar-su uDti hain main KHamosh hun

guftugu ke daeron mein phail kar

rang bharta ja raha hai un tamannaon ka KHun

jin ke lafzon ne zaban di sunne walon ka KHayal

un mein Duba ja raha hai bolte lafzon ka sahar

us ko apne dam mein lata hua

phail kar aata hai mujh tak pech-o-KHam khata hua

aur main

us ki kaifiyat ka ghaza apne chehre par lagae

ek nai aawaz ke sae mein hun

chahta hun band aankhon se main us sailab mein

kud jaun aur nazzara karun

apne kanon se dilon ke tarjuman alfaz ka

surat goya se baDh kar hai suKHan-andaz ka

nuqrai aawaz mein lafzon ka nur

apne hamrahi ke dil par naghma-bar

jaise shabnam daman-e-gul par gire be-iKHtiyar

is sada mein harf hain ya mom ke aansu hain jo

shama ke pahlu mein girte ja rahe hain kya karun

aankhen kholun aur us bachchi ki surat dekh lun

us sada mein naKHwat-e-zar ka jalal

jaise parbat se gire jharna koi

sang-e-aswad ki chaTanen toDna

dost ham-sin ham-suKHan

jin ke sada saf se andaz mein

koi mazi koi mustaqbil nahin

haal ke lamhat rangin qahqahe phulon ke haar

aur us aawaz mein

zist ki mahrumiyan zanjir dar zanjir hain

kholte lafzon ki bhap

dil ke aaine ko dhundlati hai hath

KHud-baKHud baDhta hai apni jeb ki jaanib magar

ye gada bhi to nahin

aur us aawaz mein hirs-o-hawas ka zahr hai

lafz tiron ki tarah uDte hue

sina-e-ehsas mein paiwast hote hain magar

dil se nafrat ke siwa koi sada uThti nahin

aur ye aawaz meri dost-dar dil teri aawaz hai

kitne naghme gunjte hain kitni raaton ka KHumar

kitne rangon ka talatum kitne phulon ki hansi

sarsaraate reshmin malbus ke manind ye teri sada

Dhanpti hai garmi-e-aghosh se parwaz mein

kho gai hain sari aawazen teri aawaz mein