andalib

ai andalīb-e-zeb-e-chaman zīnat-e-chaman

hamdam qalaq-nasīboñ kī ulfat ke māroñ kī

shīrīñ tirī navā hai agarche hai pur-ḳharosh

dilkash tirī sadā hai agarche hai dil-ḳharāsh

sāzoñ meñ hai vo baat kahāñ jo ki tujh meñ hai

ulfat kahāñ hai un ko kisī se kahāñ hai laag

he he kisī ke soz se un ko kahāñ hai saaz

be-shubah un meñ lahn hai ik ḳhaas taur kā

be-shubah un kī chheḌ se tharrātī hai havā

lekin tirī sadā se haiñ zāhir ye saaf saaf

ālām-e-yās josh-e-dilī sadma-e-firāq

ya.anī tirī navā hai vo tharrā.e jis se dil

chaltī hai jis ghaḌī ki shab-e-māh meñ sabā

aur jab ki mast ho ho ke hiltī hai shāḳh-e-gul

is vaqt tū jo kartī hai fariyād ham-safīr

betāb aur kartī hai hijrāñ-nasīb ko

lekin tū jis ke vāste rahtī hai be-qarār

hotā hai is kā qurb mahīnoñ tujhe nasīb

hotī hai har bahār meñ tujh ko na.ī bahār

un ko tū dekh dil ko hai jin ke kisī se laag

māshūq kā magar nahīñ nazāra tak nasīb

barsoñ nahīñ hai kūcha-e-dildār tak guzār

fariyād-o-nāla karte haiñ din raat vo magar

mumkin nahīñ ki kānoñ tak us ke pahuñch sake

ai andalib-e-zeb-e-chaman zinat-e-chaman

hamdam qalaq-nasibon ki ulfat ke maron ki

shirin teri nawa hai agarche hai pur-KHarosh

dilkash teri sada hai agarche hai dil-KHarash

sazon mein hai wo baat kahan jo ki tujh mein hai

ulfat kahan hai un ko kisi se kahan hai lag

he he kisi ke soz se un ko kahan hai saz

be-shubah un mein lahn hai ek KHas taur ka

be-shubah un ki chheD se tharraati hai hawa

lekin teri sada se hain zahir ye saf saf

aalam-e-yas josh-e-dili sadma-e-firaq

yani teri nawa hai wo tharrae jis se dil

chalti hai jis ghaDi ki shab-e-mah mein saba

aur jab ki mast ho ho ke hilti hai shaKH-e-gul

is waqt tu jo karti hai fariyaad ham-safir

betab aur karti hai hijran-nasib ko

lekin tu jis ke waste rahti hai be-qarar

hota hai is ka qurb mahinon tujhe nasib

hoti hai har bahaar mein tujh ko nai bahaar

un ko tu dekh dil ko hai jin ke kisi se lag

mashuq ka magar nahin nazara tak nasib

barson nahin hai kucha-e-dildar tak guzar

fariyaad-o-nala karte hain din raat wo magar

mumkin nahin ki kanon tak us ke pahunch sake