andha

suntā hai husn-e-shams-o-qamar dekhtā nahīñ

ya.anī nizām-e-shām-o-sahar dekhtā nahīñ

us ke bhī pairahan pe gunāhoñ ke daaġh haiñ

duniyā ko chāhtā hai magar dekhtā nahīñ

us ko bhī haiñ nasīb mohabbat kī lazzateñ

dil thāmtā hai tīr-e-nazar dekhtā nahīñ

us ke bhī dil meñ aag bhaḌaktī hai ishq kī

jaltā hai aur raqs-e-sharar dekhtā nahīñ

us ke bhī sar ne paayā hai ehsās-e-bandagī

sajda meñ gar tū jaatā hai dar dekhtā nahīñ

us ko sambhāl letī haiñ har baar Thokareñ

chaltā hai aur rāhguzar dekhtā nahīñ

bātoñ se taaḌ letā hai bātin kī hālateñ

miltā hai aur rū-e-bashar dekhtā nahīñ

hañstā hai sirf apne liye ġhair par nahīñ

rotā hai aur dāman-e-tar dekhtā nahīñ

ma.alūm hai tamavvul-o-ġhurbat kī kashmakash

āñkhoñ se imtiyāz-e-nazar dekhtā nahīñ

us ko sukūn chāhiye jiine ke vāste

rahtā hai aur apnā hī ghar dekhtā nahīñ

sunta hai husn-e-shams-o-qamar dekhta nahin

yani nizam-e-sham-o-sahar dekhta nahin

us ke bhi pairahan pe gunahon ke dagh hain

duniya ko chahta hai magar dekhta nahin

us ko bhi hain nasib mohabbat ki lazzaten

dil thamta hai tir-e-nazar dekhta nahin

us ke bhi dil mein aag bhaDakti hai ishq ki

jalta hai aur raqs-e-sharar dekhta nahin

us ke bhi sar ne paya hai ehsas-e-bandagi

sajda mein gar tu jata hai dar dekhta nahin

us ko sambhaal leti hain har bar Thokaren

chalta hai aur rahguzar dekhta nahin

baaton se taD leta hai baatin ki haalaten

milta hai aur ru-e-bashar dekhta nahin

hansta hai sirf apne liye ghair par nahin

rota hai aur daman-e-tar dekhta nahin

malum hai tamawwul-o-ghurbat ki kashmakash

aankhon se imtiyaz-e-nazar dekhta nahin

us ko sukun chahiye jine ke waste

rahta hai aur apna hi ghar dekhta nahin