andhe pujari

ye kaun log sar-e-mai-kada pahuñch aa.e

chhalak rahā hai lahū hī lahū ayāġhoñ se

ye kaun log haiñ jo zindagī ke mahloñ ko

sajāne aa.e haiñ bujhte hue charāġhoñ se

baras rahā hai añdherā jabīñ ke dāġhoñ se

ye kaun log haiñ jo āftāb se chhup kar

purānī sham.oñ pe nazreñ jamā.e phirte haiñ

ye kaun log haiñ jo irtiqā kī manzil meñ

na.ī hayāt se dāman bachā.e phirte haiñ

rivāyatoñ ke janāze uThā.e phirte haiñ

unheñ pasand nahīñ shāḳh-e-gul kī ra.anā.ī

sulūk-e-bād-e-chaman nāgavār hai in ko

bhaTak rahe haiñ ye maazī ke reg-zāroñ meñ

bahār-e-nau kā tasavvur bhī baar hai un ko

jo fasl biit chukī us se pyaar hai un ko

bharā hai ahd-e-kuhan kā ġhubār āñkhoñ meñ

unheñ girāñ hai na.ī kā.enāt kā partav

ye mandiroñ ke pujārī ye masjidoñ ke imaam

ye tīrgī ke musāfir ye raat ke rahrav

ufuq ko noch rahe haiñ ki toḌ leñ mah-e-nau

havas kī qaid meñ hai ābrū-e-lāla-o-gul

chaman-farosh bane haiñ chaman ke rakhvāle

zarā sañbhal ke chale kārvān-e-rang-o-numū

ki ḳhaar baiThe haiñ phūloñ kī chilmaneñ Daale

sabā ke bhes meñ phirte haiñ lauTne vaale

ye log halqa-e-dām-e-ḳhayāl kahte haiñ

faroġh-e-ilm ko science kī taraqqī ko

ye kam-nigāh mudāvā-e-dard-e-insānī

samajh rahe haiñ prāchīn sanskirtī ko

sadā.eñ dete haiñ sadiyoñ kī tīra-baḳhtī ko

zabān-o-firqa-o-maz.hab ke ġhaar meñ ye log

hue haiñ ġharq kuchh aise ubhar nahīñ sakte

aTe haiñ gard meñ jab tak diloñ ke ā.īne

na.e nuqūsh meñ ham rang bhar nahīñ sakte

nigār-e-hind ke gesū sañvar nahīñ sakte

jaleñ na ruuh meñ jab tak mohabbatoñ ke charāġh

tilism-e-tīra-ḳhayālī se ham na chhūTeñge

vo log ma.abad-e-insāniyat kī sair kareñ

jo kah rahe haiñ ki dair-o-haram na chhūTeñge

jo zid meñ haiñ ki purāne sanam na chhūTeñge

ye kaun log sar-e-mai-kada pahunch aae

chhalak raha hai lahu hi lahu ayaghon se

ye kaun log hain jo zindagi ke mahlon ko

sajaane aae hain bujhte hue charaghon se

baras raha hai andhera jabin ke daghon se

ye kaun log hain jo aaftab se chhup kar

purani shamon pe nazren jamae phirte hain

ye kaun log hain jo irtiqa ki manzil mein

nai hayat se daman bachae phirte hain

riwayaton ke janaze uThae phirte hain

unhen pasand nahin shaKH-e-gul ki ranai

suluk-e-baad-e-chaman nagawar hai in ko

bhaTak rahe hain ye mazi ke reg-zaron mein

bahaar-e-nau ka tasawwur bhi bar hai un ko

jo fasl bit chuki us se pyar hai un ko

bhara hai ahd-e-kuhan ka ghubar aankhon mein

unhen giran hai nai kaenat ka partaw

ye mandiron ke pujari ye masjidon ke imam

ye tirgi ke musafir ye raat ke rahraw

ufuq ko noch rahe hain ki toD len mah-e-nau

hawas ki qaid mein hai aabru-e-lala-o-gul

chaman-farosh bane hain chaman ke rakhwale

zara sanbhal ke chale karwan-e-rang-o-numu

ki KHar baiThe hain phulon ki chilmanen Dale

saba ke bhes mein phirte hain lauTne wale

ye log halqa-e-dam-e-KHayal kahte hain

farogh-e-ilm ko science ki taraqqi ko

ye kam-nigah mudawa-e-dard-e-insani

samajh rahe hain prachin sanskirti ko

sadaen dete hain sadiyon ki tira-baKHti ko

zaban-o-firqa-o-mazhab ke ghaar mein ye log

hue hain gharq kuchh aise ubhar nahin sakte

aTe hain gard mein jab tak dilon ke aaine

nae nuqush mein hum rang bhar nahin sakte

nigar-e-hind ke gesu sanwar nahin sakte

jalen na ruh mein jab tak mohabbaton ke charagh

tilism-e-tira-KHayali se hum na chhuTenge

wo log mabad-e-insaniyat ki sair karen

jo kah rahe hain ki dair-o-haram na chhuTenge

jo zid mein hain ki purane sanam na chhuTenge