andhera

abhī raushan hai ye charāġh

to ye na samjho

kī ab añdhere kā

koī vajūd hī na rahā

kī vo

raushnī kī talvār se kaaT kar

merā jā chukā hai

is dhoke meñ na rahnā

kī vo hamesha kī liye

ḳharīda jā chukā hai

us ne to bas ik chālāk aur shātir

sipāh sālār kī tarah

apnī pahlī haar ko

pahlī baazī jītne vaale dushman kī

jagmagāhaTī vardī meñ chhupā liyā hai

aur is ke ḳheme meñ

is tarah ghul mil gayā hai

jaise ab us kā apnā koī vajūd na ho

lekin dar-asl vo

samāyā huā hai inhīñ ujāloñ kī zaat meñ

is charāġh kī jalne kī vaj.h ban kar

yahīñ kahīñ

isī raat meñ

baḌe sabr se is ghaat meñ

ki kab ye lau paḌe maddham

aur vo TuuT paḌe

ik shahbāz kī mānind

apne siyāh Dā.ine phailā.e

aur ġhanīmat ke kamzor fāḳhte ko

apne changul meñ daboch le jaa.e

merī baat kā yaqīn na aa.e

to chand lamhoñ ke liye

koī ye charāġh yahāñ se le jaa.e

abhī raushan hai ye charāġh

to āñdhiyoñ se bachāo use

ye ne samjhāo ki ab añdhere kā

koī vajūd hī na rahā

abhi raushan hai ye charagh

to ye na samjho

ki ab andhere ka

koi wajud hi na raha

ki wo

raushni ki talwar se kaT kar

mera ja chuka hai

is dhoke mein na rahna

ki wo hamesha ki liye

KHarida ja chuka hai

us ne to bas ek chaalak aur shatir

sipah salar ki tarah

apni pahli haar ko

pahli bazi jitne wale dushman ki

jagmagahaTi wardi mein chhupa liya hai

aur is ke KHeme mein

is tarah ghul mil gaya hai

jaise ab us ka apna koi wajud na ho

lekin dar-asl wo

samaya hua hai inhin ujalon ki zat mein

is charagh ki jalne ki wajh ban kar

yahin kahin

isi raat mein

baDe sabr se is ghat mein

ki kab ye lau paDe maddham

aur wo TuT paDe

ek shahbaz ki manind

apne siyah Daine phailae

aur ghanimat ke kamzor faKHte ko

apne changul mein daboch le jae

meri baat ka yaqin na aae

to chand lamhon ke liye

koi ye charagh yahan se le jae

abhi raushan hai ye charagh

to aandhiyon se bachao use

ye ne samjhao ki ab andhere ka

koi wajud hi na raha