andheri raat ka musafir

javānī kī añdherī raat hai zulmat kā tūfāñ hai

mirī rāhoñ se nūr-e-māh-o-anjum tak gurezāñ hai

ḳhudā soyā huā hai ahrman mahshar-ba-dāmāñ hai

magar maiñ apnī manzil kī taraf baḌhtā hī jaatā huuñ

ġham o hirmāñ kī yūrish hai masā.ib kī ghaTā.eñ haiñ

junūñ kī fitna-ḳhezī husn kī ḳhūnīñ adā.eñ haiñ

baḌī pur-zor āñdhī hai baḌī kāfir balā.eñ haiñ

magar maiñ apnī manzil kī taraf baḌhtā hī jaatā huuñ

fazā meñ maut ke tārīk saa.e thartharāte haiñ

havā ke sard jhoñke qalb par ḳhanjar chalāte haiñ

guzishta ishratoñ ke ḳhvāb ā.īna dikhāte haiñ

magar maiñ apnī manzil kī taraf baḌhtā hī jaatā huuñ

zamīñ chīñ-bar-jabīñ hai āsmāñ taḳhrīb par maa.il

rafīqān-e-safar meñ koī bismil hai koī ghā.el

ta.āqub meñ luTere haiñ chaTāneñ raah meñ haa.el

magar maiñ apnī manzil kī taraf baḌhtā hī jaatā huuñ

ufuq par zindagī ke lashkar-e-zulmat kā Derā hai

havādis ke qayāmat-ḳhez tūfānoñ ne gherā hai

jahāñ tak dekh saktā huuñ añdherā hī añdherā hai

magar maiñ apnī manzil kī taraf baḌhtā hī jaatā huuñ

charāġh-e-dair fānūs-e-haram qindīl-e-rahbānī

ye sab haiñ muddatoñ se be-niyāz-e-nūr-e-irfānī

na nāqūs-e-barhaman hai na āhañg-e-hudā-ḳhvānī

magar maiñ apnī manzil kī taraf baḌhtā hī jaatā huuñ

talātum-ḳhez dariyā aag ke maidān haa.el haiñ

garajtī āñdhiyāñ biphre hue tūfān haa.el haiñ

tabāhī ke farishte jabr ke shaitān haa.el haiñ

magar maiñ apnī manzil kī taraf baḌhtā hī jaatā huuñ

fazā meñ sho.ala-afshāñ dev-e-istibdād kā ḳhanjar

siyāsat kī sanāneñ ahl-e-zar ke ḳhūñ-chakāñ tevar

fareb-e-be-ḳhudī dete hue billor ke sāġhar

magar maiñ apnī manzil kī taraf baḌhtā hī jaatā huuñ

badī par bārish-e-lutf-o-karam nekī pe ta.azīreñ

javānī ke hasīñ ḳhvāboñ kī haibatnāk ta.abīreñ

nukīlī tez sañgīneñ haiñ ḳhūñ-āshām shamshīreñ

magar maiñ apnī manzil kī taraf baḌhtā hī jaatā huuñ

hukūmat ke mazāhir jañg ke pur-haul naqshe haiñ

kudāloñ ke muqābil top bandūqeñ haiñ neze haiñ

salāsil tāziyāne beḌiyāñ phāñsī ke taḳhte haiñ

magar maiñ apnī manzil kī taraf baḌhtā hī jaatā huuñ

ufuq par jañg kā ḳhūnīñ sitāra jagmagātā hai

har ik jhoñkā havā kā maut kā paiġhām laatā hai

ghaTā kī ghan-garaj se qalb-e-gītī kaañp jaatā hai

magar maiñ apnī manzil kī taraf baḌhtā hī jaatā huuñ

fanā ke āhanī vahshat-asar qadmoñ kī aahaT hai

dhuveñ kī badliyāñ haiñ goliyoñ kī sansanāhaT hai

ajal ke qahqahe haiñ zalzaloñ kī gaḌgaḌāhaT hai

magar maiñ apnī manzil kī taraf baḌhtā hī jaatā huuñ

jawani ki andheri raat hai zulmat ka tufan hai

meri rahon se nur-e-mah-o-anjum tak gurezan hai

KHuda soya hua hai ahrman mahshar-ba-daman hai

magar main apni manzil ki taraf baDhta hi jata hun

gham o hirman ki yurish hai masaib ki ghaTaen hain

junun ki fitna-KHezi husn ki KHunin adaen hain

baDi pur-zor aandhi hai baDi kafir balaen hain

magar main apni manzil ki taraf baDhta hi jata hun

faza mein maut ke tarik sae thartharaate hain

hawa ke sard jhonke qalb par KHanjar chalate hain

guzishta ishraton ke KHwab aaina dikhate hain

magar main apni manzil ki taraf baDhta hi jata hun

zamin chin-bar-jabin hai aasman taKHrib par mail

rafiqan-e-safar mein koi bismil hai koi ghael

taaqub mein luTere hain chaTanen rah mein hael

magar main apni manzil ki taraf baDhta hi jata hun

ufuq par zindagi ke lashkar-e-zulmat ka Dera hai

hawadis ke qayamat-KHez tufanon ne ghera hai

jahan tak dekh sakta hun andhera hi andhera hai

magar main apni manzil ki taraf baDhta hi jata hun

charagh-e-dair fanus-e-haram qindil-e-rahbani

ye sab hain muddaton se be-niyaz-e-nur-e-irfani

na naqus-e-barhaman hai na aahang-e-huda-KHwani

magar main apni manzil ki taraf baDhta hi jata hun

talatum-KHez dariya aag ke maidan hael hain

garajti aandhiyan biphre hue tufan hael hain

tabahi ke farishte jabr ke shaitan hael hain

magar main apni manzil ki taraf baDhta hi jata hun

faza mein shoala-afshan dew-e-istibdad ka KHanjar

siyasat ki sananen ahl-e-zar ke KHun-chakan tewar

fareb-e-be-KHudi dete hue billor ke saghar

magar main apni manzil ki taraf baDhta hi jata hun

badi par barish-e-lutf-o-karam neki pe taziren

jawani ke hasin KHwabon ki haibatnak tabiren

nukili tez sanginen hain KHun-asham shamshiren

magar main apni manzil ki taraf baDhta hi jata hun

hukumat ke mazahir jang ke pur-haul naqshe hain

kudalon ke muqabil top banduqen hain neze hain

salasil taziyane beDiyan phansi ke taKHte hain

magar main apni manzil ki taraf baDhta hi jata hun

ufuq par jang ka KHunin sitara jagmagata hai

har ek jhonka hawa ka maut ka paigham lata hai

ghaTa ki ghan-garaj se qalb-e-giti kanp jata hai

magar main apni manzil ki taraf baDhta hi jata hun

fana ke aahani wahshat-asar qadmon ki aahaT hai

dhuwen ki badliyan hain goliyon ki sansanahaT hai

ajal ke qahqahe hain zalzalon ki gaDgaDahaT hai

magar main apni manzil ki taraf baDhta hi jata hun