andhiyara

añdhiyārā aur ḳhāmoshī mil jaate haiñ

dard bahut baḌh jaatā hai

duniyā par vahshat chhā jaatī hai

kahne ko bāteñ haiñ bā-ma.anī bhī be-ma.anī bhī

jab baat kā matlab uḌ jaa.e

alfāz pareshāñ ho jaa.eñ

kyā jaane kyā kahnā kis se kahnā kyā hai

patthar patthar Thokar lagtī hai

rishta ġhā.eb ho jaatā hai

apne se yā aur kisī se

bandhan kaisā?

gambhīr udāsī chhā jaatī hai

tanhā tanhā sab kī rāheñ

apnī apnī sab kī bolī

mahrūmī har sūrat sab kī mahrūmī hai

sāvan kā manzar

har jānib harā harā hai

andhiyara aur KHamoshi mil jate hain

dard bahut baDh jata hai

duniya par wahshat chha jati hai

kahne ko baaten hain ba-mani bhi be-mani bhi

jab baat ka matlab uD jae

alfaz pareshan ho jaen

kya jaane kya kahna kis se kahna kya hai

patthar patthar Thokar lagti hai

rishta ghaeb ho jata hai

apne se ya aur kisi se

bandhan kaisa?

gambhir udasi chha jati hai

tanha tanha sab ki rahen

apni apni sab ki boli

mahrumi har surat sab ki mahrumi hai

sawan ka manzar

har jaanib hara hara hai