andoh-e-visal

aa.ina raakh huā

be-karāñ shab kī sisaktī huī ḳhāmoshī meñ

chashm-e-hairat se pighaltā huā sahrā niklā

reg-e-girya se ka.ī naqsh bane

TūTte chubhte bikharte hue naqsh

rag-o-resha se ulajhte hue naqsh

naḳhl-e-imkāñ ko bhasm kartī huī aag uThī

aag zholīda ḳhayāloñ ko jalātī huī aag

jism meñ raakh siyah raakh bichhātī huī aag

aur is raakh se ummīd kā jhulsā huā aks

band kamre meñ añdhere kā sahārā pā kar

bain kartā dar-o-dīvār ke andar niklā

aa.ina raakh huā

ghar kī dahlīz se kuchh ḳhaak uḌī

baam pe rakkhe charāġhoñ kī vo Thahrī huī lau

band hote hue darvāze kī āvāz ke saath

kapkapāte hue mādūm huī

sahn meñ rakhe hue gamle se

gul-e-nargis kī laḌī TuuT girī

kuchh parinde ghanī shāḳhoñ se uḌe

aur dālān meñ jāmun kā shajar suukh gayā

aaina rakh hua

be-karan shab ki sisakti hui KHamoshi mein

chashm-e-hairat se pighalta hua sahra nikla

reg-e-girya se kai naqsh bane

TuTte chubhte bikharte hue naqsh

rag-o-resha se ulajhte hue naqsh

naKHl-e-imkan ko bhasm karti hui aag uThi

aag zholida KHayalon ko jalati hui aag

jism mein rakh siyah rakh bichhati hui aag

aur is rakh se ummid ka jhulsa hua aks

band kamre mein andhere ka sahaara pa kar

bain karta dar-o-diwar ke andar nikla

aaina rakh hua

ghar ki dahliz se kuchh KHak uDi

baam pe rakkhe charaghon ki wo Thahri hui lau

band hote hue darwaze ki aawaz ke sath

kapkapate hue madum hui

sahn mein rakhe hue gamle se

gul-e-nargis ki laDi TuT giri

kuchh parinde ghani shaKHon se uDe

aur dalan mein jamun ka shajar sukh gaya