andoh-nak

maiñ apnī ātish meñ jal rahā thā

to maiñ ne dekhā

ki log mujh se zarā hī duur

ik gaḌhe ke atrāf yuuñ jam.a the

ki jaise duniyā ke saare kāmoñ ko chhoḌ kar

sirf mere jalne ke muntazir hoñ

vo der se

ustuḳhvāñ lahad meñ utārne ke liye khaḌe the

vo sab azādār the magar

hasb-e-ādat hī phabtiyāñ kas rahe the mujh par

maiñ jal rahā thā

magar mire kaan un kī āvāz sun rahe the

mirī nigāheñ talāsh meñ thiiñ

ki vaar mujh par kiyā thā kis ne

maiñ sochtā thā ki apne bujhne se peshtar hī

maiñ apnī āñkheñ

havā ke jhoñkoñ se bāñdh dūñgā

phir is ke kuchh der baa'd

mujh ko shabīh merī dikhā.ī dī thī

maiñ apnī āñkhoñ meñ jal rahā thā

pighal rahā thā

aur agle lamhe

mirī nazar jab dobāra uTThī to maiñ ne dekhā

ki merā ham-zād ek patthar kī aaḌ le kar

mirā hī Dhāñcha chabā rahā thā

main apni aatish mein jal raha tha

to main ne dekha

ki log mujh se zara hi dur

ek gaDhe ke atraf yun jama the

ki jaise duniya ke sare kaamon ko chhoD kar

sirf mere jalne ke muntazir hon

wo der se

ustuKHwan lahad mein utarne ke liye khaDe the

wo sab azadar the magar

hasb-e-adat hi phabtiyan kas rahe the mujh par

main jal raha tha

magar mere kan un ki aawaz sun rahe the

meri nigahen talash mein thin

ki war mujh par kiya tha kis ne

main sochta tha ki apne bujhne se peshtar hi

main apni aankhen

hawa ke jhonkon se bandh dunga

phir is ke kuchh der ba'd

mujh ko shabih meri dikhai di thi

main apni aankhon mein jal raha tha

pighal raha tha

aur agle lamhe

meri nazar jab dobara uTThi to main ne dekha

ki mera ham-zad ek patthar ki aaD le kar

mera hi Dhancha chaba raha tha