anis-nagi ke nam

dam-e-visāl nigāhoñ meñ hijr kā manzar

misāl-e-gardish-e-ā.īna

aise boltā hai

ki jaise kūcha-e-ḳhāk-e-vajūd ke andar

ġhubār niiñd kā hairat ke raaz kholtā hai

maiñ jāgtā huuñ

magar shahr mere saath nahīñ

havā ne baam pe rakkhe diye bujhā.e haiñ

shab-e-siyāh ne

ham sab ke dil dukhā.e haiñ

maiñ be-kanār se raste pe paañv paañv chalā

kināra-e-mah-o-anjum kī samt kho baiThā

mire halīf

mujhe ruuh kī amaañ de kar

duā ke dasht meñ mujh ko akelā chhoḌ ga.e

barahnagī mire chehre ko Dhāñpne aa.ī

ulajh rahe haiñ mire ḳhvāb merī āñkhoñ se

maiñ ūñghtā huuñ

ki shāyad vo din palaT aa.eñ

ki jin ke paas amānat hai merī chāragarī

maiñ muntazir huuñ ki shāyad

ba-vaqt-e-qurb-e-sahar

mirī jabīñ pe ujāle kā daaġh ban jaa.e

hisār-e-chashm meñ

aañsū charāġh ban jaa.e!

dam-e-visal nigahon mein hijr ka manzar

misal-e-gardish-e-aina

aise bolta hai

ki jaise kucha-e-KHak-e-wajud ke andar

ghubar nind ka hairat ke raaz kholta hai

main jagta hun

magar shahr mere sath nahin

hawa ne baam pe rakkhe diye bujhae hain

shab-e-siyah ne

hum sab ke dil dukhae hain

main be-kanar se raste pe panw panw chala

kinara-e-mah-o-anjum ki samt kho baiTha

mere halif

mujhe ruh ki aman de kar

dua ke dasht mein mujh ko akela chhoD gae

barahnagi mere chehre ko Dhanpne aai

ulajh rahe hain mere KHwab meri aankhon se

main unghta hun

ki shayad wo din palaT aaen

ki jin ke pas amanat hai meri chaaragari

main muntazir hun ki shayad

ba-waqt-e-qurb-e-sahar

meri jabin pe ujale ka dagh ban jae

hisar-e-chashm mein

aansu charagh ban jae!