apahij dinon ki nadamat

khiḌkiyāñ khol do

zabt kī khiḌkiyāñ khol do

maiñ khilūñ june kī dopahar meñ

december kī shab meñ

sabhī mausamoñ ke kaTahre meñ apnī nafī kā maiñ isbāt ban kar khilūñ

ḳhvāhishoñ

niiñd kī jañgalī jhāḌiyoñ

apne hī ḳhuun kī daldaloñ meñ khilūñ

bhā.iyoñ kī phaTī āstīnoñ meñ

bahnoñ ke sajdoñ meñ

māñ-bāp ke be-zabāñ dard meñ adh-jale cigaretoñ kā tamāsha banūñ

har na.ī sub.h ke bas-sTopoñ pe Thahrī huī laḌkiyoñ kī kitāboñ meñ

maslūb hone chalūñ

maiñ apāhij dinoñ kī nadāmat banūñ

khiḌkiyāñ khol do

chhoḌ do rāste

shahr-e-be-ḳhvāb meñ ghūmne do mujhe

sub.h se shaam tak shaam se sub.h tak

us añdhere kī ik ik karan chūmne do mujhe

jis meñ bezār lamhoñ kī sāzish huī

aur dahaloñ se nahle baḌe ho ga.e

jis meñ be-nūr kirnoñ kī bārish huī

bahr-e-shab-zād meñ jo safīne utāre bhañvar ban ga.e

ḳhvāb meñ ḳhvāb ke phuul khilne lage khiḌkiyāñ khol do

jāgne do mujhe

khiDkiyan khol do

zabt ki khiDkiyan khol do

main khilun june ki dopahar mein

december ki shab mein

sabhi mausamon ke kaTahre mein apni nafi ka main isbaat ban kar khilun

KHwahishon

nind ki jangali jhaDiyon

apne hi KHun ki daldalon mein khilun

bhaiyon ki phaTi aastinon mein

bahnon ke sajdon mein

man-bap ke be-zaban dard mein adh-jale cigareton ka tamasha banun

har nai subh ke bas-sTopon pe Thahri hui laDkiyon ki kitabon mein

maslub hone chalun

main apahij dinon ki nadamat banun

khiDkiyan khol do

chhoD do raste

shahr-e-be-KHwab mein ghumne do mujhe

subh se sham tak sham se subh tak

us andhere ki ek ek karan chumne do mujhe

jis mein bezar lamhon ki sazish hui

aur dahalon se nahle baDe ho gae

jis mein be-nur kirnon ki barish hui

bahr-e-shab-zad mein jo safine utare bhanwar ban gae

KHwab mein KHwab ke phul khilne lage khiDkiyan khol do

jagne do mujhe