apne aap se ek mukalima

nahīñ ye maiñ nahīñ huuñ

maiñ nahīñ huuñ

aur agar ye maiñ nahīñ huuñ

kaun hai vo

jo mujhe āvāz detā hai

mirī hī zaat ke andhe kueñ se

aur agar ye maiñ nahīñ huuñ

kaun thā jo ab nahīñ mujh meñ

vo maiñ hī thā

jo kal

paanī pe chaltā thā

havāoñ par bhī merī hukmrānī thī

bulandī sī bulandī bhī

bahut kam thī

mirī parvāz ke aage

parindoñ kī zabāñ aatī thī mujh ko

guftugū kartā thā maiñ un se

maiñ kal

āvāz ke chehroñ ko paḌhtā thā

samundar chāñd sūraj aur sitāre bhī

mire qadmoñ meñ apnā sar jhukāte the

magar ab maiñ kahāñ huuñ

haañ vo tum hī the

magar ab tum kahāñ ho

koī ab kyūñkar mujhe DhūñDe

maiñ ḳhud ko kho chukā huuñ

āsmānoñ se zamīñ kā fāsla jitnā hai

utnā fāsla

ḳhud mere apne darmiyāñ kyoñ aa gayā hai

vaqt dariyā kī tarah chaltā rahā

aur yaañ kisī ne bhī

mujhe rokā nahīñ

us samt jaane se

jahāñ se muḌ ke dekhā thā

to maiñ patthar banā thā

aaj bhī patthar banā phirtā huuñ har-sū

is zamīñ par

āsmāñ par

aur ḳhalāoñ meñ

samundar par

havāoñ meñ

mirī vahshat ne mujh ko

har jagah rusvā kiyā hai

ab koī āb-e-baqā lā de

koī merī ḳhabar lā de

kahāñ huuñ maiñ

kahāñ ho tum

ye apne aap se pūchho

ye apne aap se pūchho

nahīñ ye maiñ nahīñ huuñ

aur agar ye maiñ nahīñ huuñ

kaun huuñ maiñ

kaun thā vo

kaun hai ye

jo mire andar se

rah rah kar mujhe

āvāz detā hai

nahin ye main nahin hun

main nahin hun

aur agar ye main nahin hun

kaun hai wo

jo mujhe aawaz deta hai

meri hi zat ke andhe kuen se

aur agar ye main nahin hun

kaun tha jo ab nahin mujh mein

wo main hi tha

jo kal

pani pe chalta tha

hawaon par bhi meri hukmrani thi

bulandi si bulandi bhi

bahut kam thi

meri parwaz ke aage

parindon ki zaban aati thi mujh ko

guftugu karta tha main un se

main kal

aawaz ke chehron ko paDhta tha

samundar chand suraj aur sitare bhi

mere qadmon mein apna sar jhukate the

magar ab main kahan hun

han wo tum hi the

magar ab tum kahan ho

koi ab kyunkar mujhe DhunDe

main KHud ko kho chuka hun

aasmanon se zamin ka fasla jitna hai

utna fasla

KHud mere apne darmiyan kyon aa gaya hai

waqt dariya ki tarah chalta raha

aur yan kisi ne bhi

mujhe roka nahin

us samt jaane se

jahan se muD ke dekha tha

to main patthar bana tha

aaj bhi patthar bana phirta hun har-su

is zamin par

aasman par

aur KHalaon mein

samundar par

hawaon mein

meri wahshat ne mujh ko

har jagah ruswa kiya hai

ab koi aab-e-baqa la de

koi meri KHabar la de

kahan hun main

kahan ho tum

ye apne aap se puchho

ye apne aap se puchho

nahin ye main nahin hun

aur agar ye main nahin hun

kaun hun main

kaun tha wo

kaun hai ye

jo mere andar se

rah rah kar mujhe

aawaz deta hai