apne dil ki shahzadi

ai mere dil kī shahzādī shahzādī aur phir doshīza

ai chāñd sitāroñ kī devī devī se ziyāda pākīza

ai sabza-zāroñ kī hirnī ai barkhā kī mīThī koyal

ai sub.h ke māthe kī shabnam ai shaam kī āñkhoñ kā kājal

ai ḳhvāb kī malika malika-e-dil dil kī dhaḌkan dhaḌkan kā sukūñ

ai chashm kī raunaq raunaq-e-jāñ jaañ kā naġhma naġhme kā fusūñ

ai niiñd kī mastī mastī-e-mai mai kī ḳhushbū ḳhushbū-e-iram

ai maah kī zau zau kī maujeñ maujoñ kī shab shab kā album

ai bholī kaliyoñ kī sāthī ai chanchal lahroñ kī raanī

ik baat maiñ tujh se kahtā huuñ dānā.ī samajh yā nādānī

maiñ garche ravish se duniyā kī bezār sā hotā jaatā huuñ

har gaam pe Thokar khā khā ke taqdīr ko rotā jaatā huuñ

merī ġhamgīn nigāhoñ meñ sunsān haiñ ye manzar saare

bastī vaadī dariyā sahrā kohsār chaman sūraj taare

phir bhī tū agar apnī zulfeñ mere shānoñ par bikhrā.e

kāñToñ se bharī merī duniyā phūloñ kī jannat ho jaa.e

phir taaza jaan sī aa jaa.e mere murjhā.e gulshan meñ

phir duniyā-bhar kī ra.anā.ī aa jaa.e simaT ke dāman meñ

mil jaa.e agar tū qismat se to har ne.amat ko Thukrā duuñ

pā jā.ūñ jo terī jannat ko to is jannat ko Thukrā duuñ

duniyā kī nazroñ se chhup kar maiñ duur bahut ābādī se

yuuñ aksar bāteñ kartā huuñ apne dil kī shahzādī se

lekin rangīn tasavvur se kab zulf-e-shauq sañvartī hai

tadbīr ke sundar sapnoñ par taqdīr tabassum kartī hai

tū aish-o-tarab kī parvarda mujh par bad-baḳhtī kā saaya

tū hai ik duḳhtar-e-ahl-e-zar maiñ huuñ ik shā.ir-e-be-māya

mere liye ik TuuTā chhappar ḳhud apnī musalsal mehnat kā

tere liye ik piilī koThī ā.īna sarāpā rishvat kā

terā kāshāna hotā hai bijlī ke tāroñ se raushan

aur mere taaq meñ rakkhā hai bas ek charāġh-e-be-roġhan

tujh ko hai shikāyat phūloñ ke bistar par niiñd na aane kī

aur kankrīlī saḌkoñ par bhī aadat hai mirī so jaane kī

tere to dastarḳhvān pe hai har ik ne.amat kī arzānī

maiñ kuchh sūkhe TukḌe khā kar pī letā huuñ thoḌā paanī

tū aksar nā-ḳhush rahtī hai resham atlas bānāt meñ bhī

maiñ ek phaTe kurte meñ ḳhush jaaḌā garmī barsāt meñ bhī

terī to daulat ke baa.is begāne tujhe apnāte haiñ

aur merī ġhurbat ke baa.is apne bhī mujhe Thukrāte haiñ

terī qismat meñ sab kuchh hai ashkoñ ke sivā ai māh-jabīñ

merī qismat meñ shāyad hai ashkoñ ke sivā aur kuchh bhī nahīñ

kis tarah 'salām' maiñ toḌūñ phir tafrīq kī in dīvāroñ ko

zarre kaise pā sakte haiñ aflāk ke ūñche tāroñ ko

ai kaash kisī sūrat palla donoñ kā barābar ho jaatā

yā tū hī muflis ho jaatī yā maiñ hī tavangar ho jaatā

ai mere dil ki shahzadi shahzadi aur phir doshiza

ai chand sitaron ki dewi dewi se ziyaada pakiza

ai sabza-zaron ki hirni ai barkha ki miThi koyal

ai subh ke mathe ki shabnam ai sham ki aankhon ka kajal

ai KHwab ki malika malika-e-dil dil ki dhaDkan dhaDkan ka sukun

ai chashm ki raunaq raunaq-e-jaan jaan ka naghma naghme ka fusun

ai nind ki masti masti-e-mai mai ki KHushbu KHushbu-e-iram

ai mah ki zau zau ki maujen maujon ki shab shab ka album

ai bholi kaliyon ki sathi ai chanchal lahron ki rani

ek baat main tujh se kahta hun danai samajh ya nadani

main garche rawish se duniya ki bezar sa hota jata hun

har gam pe Thokar kha kha ke taqdir ko rota jata hun

meri ghamgin nigahon mein sunsan hain ye manzar sare

basti wadi dariya sahra kohsar chaman suraj tare

phir bhi tu agar apni zulfen mere shanon par bikhrae

kanTon se bhari meri duniya phulon ki jannat ho jae

phir taza jaan si aa jae mere murjhae gulshan mein

phir duniya-bhar ki ranai aa jae simaT ke daman mein

mil jae agar tu qismat se to har neamat ko Thukra dun

pa jaun jo teri jannat ko to is jannat ko Thukra dun

duniya ki nazron se chhup kar main dur bahut aabaadi se

yun aksar baaten karta hun apne dil ki shahzadi se

lekin rangin tasawwur se kab zulf-e-shauq sanwarti hai

tadbir ke sundar sapnon par taqdir tabassum karti hai

tu aish-o-tarab ki parwarda mujh par bad-baKHti ka saya

tu hai ek duKHtar-e-ahl-e-zar main hun ek shair-e-be-maya

mere liye ek TuTa chhappar KHud apni musalsal mehnat ka

tere liye ek pili koThi aaina sarapa rishwat ka

tera kashana hota hai bijli ke taron se raushan

aur mere taq mein rakkha hai bas ek charagh-e-be-roghan

tujh ko hai shikayat phulon ke bistar par nind na aane ki

aur kankrili saDkon par bhi aadat hai meri so jaane ki

tere to dastarKHwan pe hai har ek neamat ki arzani

main kuchh sukhe TukDe kha kar pi leta hun thoDa pani

tu aksar na-KHush rahti hai resham atlas banat mein bhi

main ek phaTe kurte mein KHush jaDa garmi barsat mein bhi

teri to daulat ke bais begane tujhe apnate hain

aur meri ghurbat ke bais apne bhi mujhe Thukraate hain

teri qismat mein sab kuchh hai ashkon ke siwa ai mah-jabin

meri qismat mein shayad hai ashkon ke siwa aur kuchh bhi nahin

kis tarah 'salam' main toDun phir tafriq ki in diwaron ko

zarre kaise pa sakte hain aflak ke unche taron ko

ai kash kisi surat palla donon ka barabar ho jata

ya tu hi muflis ho jati ya main hi tawangar ho jata