apne dil mein Dar

apne dil meñ Dar ho to ye bādal kis ko lubhā sakte haiñ

apne dil meñ Dar ho to sab ruteñ Darāonī lagtī haiñ aur apnī taraf hī gardan

jhuk jaatī hai

ye to apnā hausla thā

itne andeshoñ meñ bhī

nazreñ apnī jānib nahīñ uThīñ aur is ghanghor ghane kohre meñ jā Duubī haiñ

aur ab merī saarī duniyā is kohre meñ nahā.ī huī haryāval kā hissa hai

merī ḳhushiyāñ bhī aur Dar bhī

aur isī raste par maiñ ne lohe ke halqoñ meñ

ik qaidī ko dekhā

aahan chehra sipāhī kī jarsī kā rag us qaidī ke ruḳh par thā

har andesha to ik kunDī hai jo dil ko apnī jānib khīñch ke rakhtī hai aur vo qaidī bhī

khichā huā thā apne dil ke ḳhauf kī jānib jis kī koī rut nahīñ hotī

maiñ bhī apne andeshoñ kā qaidī huuñ lekin us qaidī ke andeshe to

ik mere sivā sab ke haiñ

ik vahī apne apne dukh kī kunDī

jis ke khichāo se ik ik gardan apnī jānib jhukī huī hai

aise meñ ab kaun ghaTāoñ bharī us sub.h-e-bahārāñ ko dekhegā

jo in bor lade andeshoñ par yuuñ jhukī huī hai aamoñ ke bāġhoñ meñ

mirī ruuh ke sāmne

apne dil mein Dar ho to ye baadal kis ko lubha sakte hain

apne dil mein Dar ho to sab ruten Daraoni lagti hain aur apni taraf hi gardan

jhuk jati hai

ye to apna hausla tha

itne andeshon mein bhi

nazren apni jaanib nahin uThin aur is ghanghor ghane kohre mein ja Dubi hain

aur ab meri sari duniya is kohre mein nahai hui haryawal ka hissa hai

meri KHushiyan bhi aur Dar bhi

aur isi raste par main ne lohe ke halqon mein

ek qaidi ko dekha

aahan chehra sipahi ki jarsi ka rag us qaidi ke ruKH par tha

har andesha to ek kunDi hai jo dil ko apni jaanib khinch ke rakhti hai aur wo qaidi bhi

khicha hua tha apne dil ke KHauf ki jaanib jis ki koi rut nahin hoti

main bhi apne andeshon ka qaidi hun lekin us qaidi ke andeshe to

ek mere siwa sab ke hain

ek wahi apne apne dukh ki kunDi

jis ke khichao se ek ek gardan apni jaanib jhuki hui hai

aise mein ab kaun ghaTaon bhari us subh-e-bahaaran ko dekhega

jo in bor lade andeshon par yun jhuki hui hai aamon ke baghon mein

meri ruh ke samne