apne nam ek nazm

use dukh ke saath byāhā gayā

ki jab aañkh khulī to sar par sūraj jaltī naañd meñ dhuul

ise dhuup ke saath byāhā gayā

ki jo shaam paḌe se din guzre tak sotī thī

use niiñd ke saath byāhā gayā

ki jo aaj ke ḳhvāb se kal ke ḳhvāb kā saudā kartī thī

use byaah ke saath byāhā gayā

ki jo kashT uThātī dhuup meñ baiThī saa.e se bāteñ kartī thī

use saa.e ke saath byāhā gayā

mallāhoñ ne us kī āñkhoñ kī tārīf nahīñ kī

bachche us ko dekh ke ruke nahīñ

laḌkiyāñ us ke libās pe chauñkīñ nahīñ

use yuuñ dafnāyā jaise machhliyāñ jaal se jaal meñ Dālte haiñ

use yuuñ nahlāyā jaise bārish aabī paudoñ ko nahlā kar ḳhush hotī hai

use shaam ke saath vidā.a kiyā

jab chāñd ghane bādal meñ chhuptā phirtā thā

aur āñkheñ chunñe vaalī machhliyāñ chunī ga.ī thiiñ

aur naav ne naav ke saath gunāh kiyā thā

miTTī paanī ke beTe ye sab kuchh dekh chuke hote to dahshat se pahle mar jaate

ye dariyā din se darvāze par rukā huā hai

din jo āgāhī hai

sub.h ko bistar tah karne

dhuup meñ toshak phailāne

kapḌe bistar-band sukhāne

raat kī battī gul karne

zanjīr hilā kar dekhne kī āgāhī

ye dariyā din se darvāze par rukā huā hai

ye dariyā raat ko andar dar aa.egā

raat ajab pachhtāvā hai

apne dūsre kī pahchān kā

din ko ghar aane

ik nasl kā qarz utārne

kāñTe chubh kar mar jaane kā pachhtāvā

ye raat ye din kyā tābaḌ-toḌ guzarte haiñ

jab uupar paanī chaltā hai

aur nīche miTTī sotī hai

aur koī man meñ pukārtā hai

maulā mujh ko bādal kar de

aur ik pichhlī raat achānak chīḳh kisī ko aa letī hai

aur ghar kā ghar uTh jaatā hai

aur din ke bahlāve meñ raat bitā.ī jaatī hai

is mausam paanī aage aa.egā tum ghar meñ mat sonā

jab chhat kī khachchī jhuk jaa.e

aur paanī chhal-chhal dikhtā ho

tab bāhar sonā achchhā rahtā hai

phir mausam apne mausam ho jaate haiñ

aur rut kannyā pāzeb utaar ke pheñktī hai

phir koī kisī se ye nahīñ kahtā

maulā mujh ko bādal kar de

yā sotī miTTī

yā chaltā paanī

phir koī kisī se kuchh nahīñ kahtā

phir sab apnī sunte haiñ

phir bādal bārish raat zamīñ sab ik chādar meñ sote haiñ

aur ik chādar meñ chalte haiñ

aur hote haiñ aur nahīñ hote haiñ

aur lafz kā vāhid sarmāya ḳhāmoshī hai

aur jo lafz nahīñ sunte haiñ ḳhāmoshī bhī nahīñ sunte haiñ

jab pahlū-dār sutūn se Tek lagā.e laḌkī sotī hai

aur hauz ke paas khaḌe shahzāde

aur un kī bāñdiyāñ

aur saarā shahr

is aan kahīñ chupke se un meñ ho jaanā

aur nahīñ kahnā maiñ aayā huuñ

achchhā hai

āgāhī aur pachhtāve aur aisī maut se jo yaksar nā-ma.alūm meñ hai

use dukh ke sath byaha gaya

ki jab aankh khuli to sar par suraj jalti nand mein dhul

ise dhup ke sath byaha gaya

ki jo sham paDe se din guzre tak soti thi

use nind ke sath byaha gaya

ki jo aaj ke KHwab se kal ke KHwab ka sauda karti thi

use byah ke sath byaha gaya

ki jo kashT uThati dhup mein baiThi sae se baaten karti thi

use sae ke sath byaha gaya

mallahon ne us ki aankhon ki tarif nahin ki

bachche us ko dekh ke ruke nahin

laDkiyan us ke libas pe chaunkin nahin

use yun dafnaya jaise machhliyan jal se jal mein Dalte hain

use yun nahlaya jaise barish aabi paudon ko nahla kar KHush hoti hai

use sham ke sath widaa kiya

jab chand ghane baadal mein chhupta phirta tha

aur aankhen chunne wali machhliyan chuni gai thin

aur naw ne naw ke sath gunah kiya tha

miTTi pani ke beTe ye sab kuchh dekh chuke hote to dahshat se pahle mar jate

ye dariya din se darwaze par ruka hua hai

din jo aagahi hai

subh ko bistar tah karne

dhup mein toshak phailane

kapDe bistar-band sukhane

raat ki batti gul karne

zanjir hila kar dekhne ki aagahi

ye dariya din se darwaze par ruka hua hai

ye dariya raat ko andar dar aaega

raat ajab pachhtawa hai

apne dusre ki pahchan ka

din ko ghar aane

ek nasl ka qarz utarne

kanTe chubh kar mar jaane ka pachhtawa

ye raat ye din kya tabaD-toD guzarte hain

jab upar pani chalta hai

aur niche miTTi soti hai

aur koi man mein pukarta hai

maula mujh ko baadal kar de

aur ek pichhli raat achanak chiKH kisi ko aa leti hai

aur ghar ka ghar uTh jata hai

aur din ke bahlawe mein raat bitai jati hai

is mausam pani aage aaega tum ghar mein mat sona

jab chhat ki khachchi jhuk jae

aur pani chhal-chhal dikhta ho

tab bahar sona achchha rahta hai

phir mausam apne mausam ho jate hain

aur rut kannya pazeb utar ke phenkti hai

phir koi kisi se ye nahin kahta

maula mujh ko baadal kar de

ya soti miTTi

ya chalta pani

phir koi kisi se kuchh nahin kahta

phir sab apni sunte hain

phir baadal barish raat zamin sab ek chadar mein sote hain

aur ek chadar mein chalte hain

aur hote hain aur nahin hote hain

aur lafz ka wahid sarmaya KHamoshi hai

aur jo lafz nahin sunte hain KHamoshi bhi nahin sunte hain

jab pahlu-dar sutun se Tek lagae laDki soti hai

aur hauz ke pas khaDe shahzade

aur un ki bandiyan

aur sara shahr

is aan kahin chupke se un mein ho jaana

aur nahin kahna main aaya hun

achchha hai

aagahi aur pachhtawe aur aisi maut se jo yaksar na-malum mein hai