apne shahr mein fasad

safed kabūtaroñ se aaj saarā ākāsh ḳhālī hai

dhuup Darī huī fāḳhta sī lagtī hai

muñDeroñ pe baiThī huī zard hai

kaañp kaañp uThtī hai havā aadmī kī tarah

curfew se bhare hue shahr kī saḌkoñ pe ghoḌoñ kī vahshī Tāpeñ

aag uḌātī haiñ

makān jalte haiñ mire tumhāre

indar hamāre dhuāñ dhuāñ sā kuchh rah rah uThtā hai

daur meñ aur paas meñ bhī zoroñ ke dhamāke hote haiñ

goliyāñ tābaḌ-toḌ sansanātī haiñ

haDDiyoñ meñ utrī jaatī haiñ

din lahū ḳhaak meñ lipTā huā guzartā hai

shaam bhī lahūluhān chhipkilī kī tarah sahmī huī chup-chāp udaas udaas

dhīre se nadī meñ Dūbtī hai

phir siyāh hote hue peḌoñ pe Dher saare gidh

apnī puurī tāqat se apne par phaḌ.phaḌāte haiñ

sannāTā kā.enāt meñ aur bhī gahrātā hai

kuchh dhuāñ dhuāñ sā andar andar mere tumhāre or bhī baḌh jaatā hai

safed kabutaron se aaj sara aakash KHali hai

dhup Dari hui faKHta si lagti hai

munDeron pe baiThi hui zard hai

kanp kanp uThti hai hawa aadmi ki tarah

curfew se bhare hue shahr ki saDkon pe ghoDon ki wahshi Tapen

aag uDati hain

makan jalte hain mere tumhaare

indar hamare dhuan dhuan sa kuchh rah rah uThta hai

daur mein aur pas mein bhi zoron ke dhamake hote hain

goliyan tabaD-toD sansanati hain

haDDiyon mein utri jati hain

din lahu KHak mein lipTa hua guzarta hai

sham bhi lahuluhan chhipkili ki tarah sahmi hui chup-chap udas udas

dhire se nadi mein Dubti hai

phir siyah hote hue peDon pe Dher sare gidh

apni puri taqat se apne par phaDphaDate hain

sannaTa kaenat mein aur bhi gahraata hai

kuchh dhuan dhuan sa andar andar mere tumhaare or bhi baDh jata hai