apni masiha ke nam

ye karb-e-taḳhlīq kaun jaane

sivā.e tere sivā.e mere

tū bint-e-maryam maiñ bint-e-havvā

mirī masīhā

ajiib rishta hai merā terā

vo lamha-e-karb

jab mujhe apne jān-o-tan kī ḳhabar nahīñ thī

har ek chehra thā dhuñdlā dhuñdlā

tamām shakleñ miTī miTī sī

faqat tirī shakl aa.ina thī

tirī sadā thī

jo mere tār-e-nafas ko chhū kar

lahū kī gardish baḌhā rahī thī

tirī sadā is ġhunūda dhaḌkan meñ

Dūbtī aur ubhartī sāñsoñ ke darmiyāñ

zindagī se labrez jām-e-shīrīñ

tirī sadā meñ vo hausla thā vo sarḳhushī thī

ki āḳhirī baar

mere māthe pe sard qatre jo jhilmilā.e

hayāt aur maut kī kashmakash ke mābain maiñ ne dekhā

tirī nigāhoñ meñ jaise mahtāb jagmagā.e

ki terā chehra ik aisī pākīza raushnī se dhulā huā thā

ki jaise injīl khultī jaa.e

vahī tulūa-e-hayāt kā ḳhush-gavār manzar

ki terā malbūs zindagī ke hazār rañgoñ se bhar chukā thā

ki tere hāthoñ ke nūr-pyāloñ meñ

merā sūraj damak rahā thā

ye karb-e-taKHliq kaun jaane

siwae tere siwae mere

tu bint-e-maryam main bint-e-hawwa

meri masiha

ajib rishta hai mera tera

wo lamha-e-karb

jab mujhe apne jaan-o-tan ki KHabar nahin thi

har ek chehra tha dhundla dhundla

tamam shaklen miTi miTi si

faqat teri shakl aaina thi

teri sada thi

jo mere tar-e-nafas ko chhu kar

lahu ki gardish baDha rahi thi

teri sada is ghunuda dhaDkan mein

Dubti aur ubharti sanson ke darmiyan

zindagi se labrez jam-e-shirin

teri sada mein wo hausla tha wo sarKHushi thi

ki aaKHiri bar

mere mathe pe sard qatre jo jhilmilae

hayat aur maut ki kashmakash ke mabain main ne dekha

teri nigahon mein jaise mahtab jagmagae

ki tera chehra ek aisi pakiza raushni se dhula hua tha

ki jaise injil khulti jae

wahi tulua-e-hayat ka KHush-gawar manzar

ki tera malbus zindagi ke hazar rangon se bhar chuka tha

ki tere hathon ke nur-pyalon mein

mera suraj damak raha tha