apni miTTi ki KHushbu

maiñ jab bastī kī sarhad par khaḌā ho kar

ufuq meñ Dūbtī rāhoñ ko taktā thā

to vo ro ro ke kahtī thī

mujhe Dar hai

tujhe ye nā-taras rāheñ na kar Dāleñ judā mujh se

maiñ apnī niim tarsāñ uñgliyoñ se us ke aañsū poñchh kar kahtā thā

ab kaisā judā honā

magar maiñ dil meñ Dartā thā

ki in rāhoñ se vāqif thā

inhī rāhoñ pe chal kar is dayār-e-ġhair meñ aayā thā aur ye soch baiThā thā

ki ye mere safar kī āḳhirī manzil hai ye in.aam hai merā

magar har-dam ufuq meñ Dūbtī rāheñ

sunahre bādaloñ kī raushnā.ī se

havā meñ kuchh purānī bastiyoñ ke naam likhtī thiiñ

use ik roz maiñ ne kah diyā mujh ko mare ajdād kā madfan bulātā hai

mirī jaañ mujh ko jaanā hai

magar tujh bin na jā.ūñgā

vo ik but kī tarah sar ko jhukā.e chup rahī lekin

ḳhamoshī ko zabāñ kahte to sab kuchh kah ga.ī mujh se

jo aañsū us kī palkoñ se gire the ḳhushk miTTī par

unheñ maiñ ne taḌapte sochte aur bolte dekhā

phir ik shab us ke pahlū se maiñ uTThā aur ufuq meñ

Dūbtī rāhoñ pe chaltā apne aabā

kī us miTTī kī ḳhushbū ke ta.āqub

meñ chalā aayā jo mere ḳhvāboñ meñ

paltī thī

mujhe pahlū se gum pā kar vo saada be-zabāñ laḌkī magar kyā sochtī hogī

main jab basti ki sarhad par khaDa ho kar

ufuq mein Dubti rahon ko takta tha

to wo ro ro ke kahti thi

mujhe Dar hai

tujhe ye na-taras rahen na kar Dalen juda mujh se

main apni nim tarsan ungliyon se us ke aansu ponchh kar kahta tha

ab kaisa juda hona

magar main dil mein Darta tha

ki in rahon se waqif tha

inhi rahon pe chal kar is dayar-e-ghair mein aaya tha aur ye soch baiTha tha

ki ye mere safar ki aaKHiri manzil hai ye inam hai mera

magar har-dam ufuq mein Dubti rahen

sunahre baadalon ki raushnai se

hawa mein kuchh purani bastiyon ke nam likhti thin

use ek roz main ne kah diya mujh ko mare ajdad ka madfan bulata hai

meri jaan mujh ko jaana hai

magar tujh bin na jaunga

wo ek but ki tarah sar ko jhukae chup rahi lekin

KHamoshi ko zaban kahte to sab kuchh kah gai mujh se

jo aansu us ki palkon se gire the KHushk miTTi par

unhen main ne taDapte sochte aur bolte dekha

phir ek shab us ke pahlu se main uTTha aur ufuq mein

Dubti rahon pe chalta apne aaba

ki us miTTi ki KHushbu ke taaqub

mein chala aaya jo mere KHwabon mein

palti thi

mujhe pahlu se gum pa kar wo sada be-zaban laDki magar kya sochti hogi