apni raat lai jao

mere ghar ke sāmne

raat kī gaaḌī kā ek pahiya nikal gayā

merā beTā us pahiye se kheltā hai

gaaḌī ko lene koī nahīñ aayā

us din se mere ghar meñ

aḳhbār nahīñ aayā

duudh nahīñ aayā

parinda nahīñ aayā

us din ke ba.ad

maiñ ne apnī nazm meñ koī shikār nahīñ khelā

maiñ apnī nazm ke andar ḳhāmosh ho gayā

aur merī nazm āhista āhista mere liye piñjra ban ga.ī

raat kī gaaḌī ko lene koī nahīñ aayā

unhoñ ne jān-būjh ke aisā kiyā hai

vo mere dil meñ bachī-khuchī chīzoñ ko shikār karnā chāhte haiñ

shāyad vo naqsha churānā chāhte haiñ

kuchh log raat kī gaaḌī se nīche utre

mere anaaj ke kamre aur merī nazmoñ kī talāshī lī

apnī hifāzat ke liye

kuchh hathiyār maiñ ne in nazmoñ meñ chhupā rakkhe the

ab mere paas chand Dare hue lafzoñ aur chhān-būre ke sivā kuchh nahīñ

unhoñ ne mere beTe kī kitābeñ chhīn liiñ

aur apnī likhī huī kitābeñ de diiñ

aur kahā ham tumhāre hī ghar meñ

tumhārī nazmoñ ke liye ek muḳhbir tayyār karnā chāhte haiñ

raat kī gaaḌī kā pahiya mujhe apne siine meñ utartā huā mahsūs huā

mere ghar kī har shai pahiye meñ badal ga.ī

hattā ki merī bāteñ bhī pahiya ban ga.iiñ

aur phir ye pahiya merī tārīḳh ban jā.egā

is tārīḳh se bahut saare bachche paidā hoñge

vo raat kī is gaaḌī ko khīñcheñge

lekin us vaqt tak raat

apnī jaḌeñ chhoḌ chukī hogī

mere ghar ke samne

raat ki gaDi ka ek pahiya nikal gaya

mera beTa us pahiye se khelta hai

gaDi ko lene koi nahin aaya

us din se mere ghar mein

aKHbar nahin aaya

dudh nahin aaya

parinda nahin aaya

us din ke baad

main ne apni nazm mein koi shikar nahin khela

main apni nazm ke andar KHamosh ho gaya

aur meri nazm aahista aahista mere liye pinjra ban gai

raat ki gaDi ko lene koi nahin aaya

unhon ne jaan-bujh ke aisa kiya hai

wo mere dil mein bachi-khuchi chizon ko shikar karna chahte hain

shayad wo naqsha churana chahte hain

kuchh log raat ki gaDi se niche utre

mere anaj ke kamre aur meri nazmon ki talashi li

apni hifazat ke liye

kuchh hathiyar main ne in nazmon mein chhupa rakkhe the

ab mere pas chand Dare hue lafzon aur chhan-bure ke siwa kuchh nahin

unhon ne mere beTe ki kitaben chhin lin

aur apni likhi hui kitaben de din

aur kaha hum tumhaare hi ghar mein

tumhaari nazmon ke liye ek muKHbir tayyar karna chahte hain

raat ki gaDi ka pahiya mujhe apne sine mein utarta hua mahsus hua

mere ghar ki har shai pahiye mein badal gai

hatta ki meri baaten bhi pahiya ban gain

aur phir ye pahiya meri tariKH ban jaega

is tariKH se bahut sare bachche paida honge

wo raat ki is gaDi ko khinchenge

lekin us waqt tak raat

apni jaDen chhoD chuki hogi