apni walida ki yaad mein

kahāñ gayā vo zamāna ki jis kī yaad meñ aaj

bhulā.e baiThā huuñ ḳhud ko patā nahīñ miltā

ga.ī kahāñ hai vo ab sūrateñ mohabbat kī

zamāne bhar meñ kahīñ naqsh-e-pā nahīñ miltā

maiñ pūchhūñ kis se patā aur kahāñ kahāñ DhūñDūñ

vahāñ kā koī bhī aayā gayā nahīñ miltā

vo aspatāl kī shab bhī thī kyā qayāmat kī

vahāñ qafas se jo taa.ir uḌā nahīñ miltā

nahīf baazū the mere liye hisār-e-amāñ

maza kahīñ bhī us āġhosh kā nahīñ miltā

vo bujhtī āñkheñ thī mere liye charāġh-e-hayāt

nigāh-e-mehr kā ab vo diyā nahīñ miltā

tamīz kaise karūñ rahzan-o-rafīq meñ ab

rah-e-hayāt kā vo rahnumā nahīñ miltā

bas ek dam se vo badlī havā zamāne kī

ki shaiḳh milte haiñ dil bā-safā nahīñ miltā

balā kā shor hai ulfat ke mai-kade meñ magar

sharāb miltī hai lekin nasha nahīñ miltā

huī hai ruuh vo ab jazb-e-rūh-e-pāk-e-azīm

milā jo zaat meñ us kī judā nahīñ miltā

vo goyā abr kā saayā thā le uḌī jo havā

bikhar ke phuul kā jaise patā nahīñ miltā

vo ek naġhma thā gum ho gayā fazāoñ meñ

ki jaise bahr meñ qatra girā nahīñ miltā

talāsh un kī yahāñ hai 'habīb' lā-hāsil

ki chashm-e-tar se jo aañsū girā nahīñ miltā

kahan gaya wo zamana ki jis ki yaad mein aaj

bhulae baiTha hun KHud ko pata nahin milta

gai kahan hai wo ab suraten mohabbat ki

zamane bhar mein kahin naqsh-e-pa nahin milta

main puchhun kis se pata aur kahan kahan DhunDun

wahan ka koi bhi aaya gaya nahin milta

wo aspatal ki shab bhi thi kya qayamat ki

wahan qafas se jo tair uDa nahin milta

nahif bazu the mere liye hisar-e-aman

maza kahin bhi us aaghosh ka nahin milta

wo bujhti aankhen thi mere liye charagh-e-hayat

nigah-e-mehr ka ab wo diya nahin milta

tamiz kaise karun rahzan-o-rafiq mein ab

rah-e-hayat ka wo rahnuma nahin milta

bas ek dam se wo badli hawa zamane ki

ki shaiKH milte hain dil ba-safa nahin milta

bala ka shor hai ulfat ke mai-kade mein magar

sharab milti hai lekin nasha nahin milta

hui hai ruh wo ab jazb-e-ruh-e-pak-e-azim

mila jo zat mein us ki juda nahin milta

wo goya abr ka saya tha le uDi jo hawa

bikhar ke phul ka jaise pata nahin milta

wo ek naghma tha gum ho gaya fazaon mein

ki jaise bahr mein qatra gira nahin milta

talash un ki yahan hai 'habib' la-hasil

ki chashm-e-tar se jo aansu gira nahin milta