arz-e-mauud

va.ade kī zamīn nahīñ aa.ī

vo ūñchā shaiḳh jo sab nazroñ meñ ghirā huā hai

be-parvā ma.asūm aTal

vo gahrā sāgar jis kī thaah meñ apne sivā koī bhī nahīñ

va.ade kī zamīn nahīñ aa.ī

naumīdī pathrā de na kahīñ

betābī jhulsā de na kahīñ

kho jaa.e na ḳhudī khoj kā ghāyal panchhī uḌaan ke saath

añdhiyārī ghāTī meñ

ham haiñ to yahī ġhanīmat hai

ham haiñ to zinda hai va.adoñ kā ugam

maujoñ ke ba.ad ubaltī maujoñ kā dhārā

jo farāmoshī ke registān meñ bahtā hai

us kī rāheñ pahle hī se muqarrar haiñ

aur un se haT kar koī raah nahīñ

sañgīn sach kī pathrīlī zamīnoñ meñ

armānoñ kā zarrīñ kohrā bikhartā

sach ke sotoñ se phūTtā rañgīn jhuuT

albele niDar sapnoñ kā bahtā gaatā jal

us moḌ pe apnī manzil se bhī fuzūñ-tar hai

phir apnā dosh hī kyā

iifā ke sūraj pighal jaate haiñ

va.adoñ kī laalī meñ ghul-mil jaate haiñ

hañgām-e-tulū-o-ġhurūb se duur

din baḌhtā hai nā raat guzartī hai

bahte haiñ ujāle shoḳh rasīle

aur madmāte dhundalke jaise basant

va.ade an-ginat khilā karte haiñ phūloñ meñ

chamkā karte haiñ sitāroñ meñ

dhaḌkanoñ meñ sāñsoñ meñ

ik samāñ suhānā chhāyā rahtā hai dhartī se ākāsh ke beach

dil se āñkhoñ tak azal abad kī vus.at meñ

wade ki zamin nahin aai

wo uncha shaiKH jo sab nazron mein ghira hua hai

be-parwa masum aTal

wo gahra sagar jis ki thah mein apne siwa koi bhi nahin

wade ki zamin nahin aai

naumidi pathra de na kahin

betabi jhulsa de na kahin

kho jae na KHudi khoj ka ghayal panchhi uDan ke sath

andhiyari ghaTi mein

hum hain to yahi ghanimat hai

hum hain to zinda hai wadon ka ugam

maujon ke baad ubalti maujon ka dhaara

jo faramoshi ke registan mein bahta hai

us ki rahen pahle hi se muqarrar hain

aur un se haT kar koi rah nahin

sangin sach ki pathrili zaminon mein

armanon ka zarrin kohra bikharta

sach ke soton se phuTta rangin jhuT

albele niDar sapnon ka bahta gata jal

us moD pe apni manzil se bhi fuzun-tar hai

phir apna dosh hi kya

ifa ke suraj pighal jate hain

wadon ki lali mein ghul-mil jate hain

hangam-e-tulu-o-ghurub se dur

din baDhta hai na raat guzarti hai

bahte hain ujale shoKH rasile

aur madmate dhundalke jaise basant

wade an-ginat khila karte hain phulon mein

chamka karte hain sitaron mein

dhaDkanon mein sanson mein

ek saman suhana chhaya rahta hai dharti se aakash ke beach

dil se aankhon tak azal abad ki wusat mein