arz-e-watan

ḳhayālāt meñ saḳht hai intishār

taḳhayyul pareshāñ qalam be-qarār

jahāñ ḳhūn-ālūda-o-ḳhūñ-rañg hai

vatan par paḌā sāya-e-rañg hai

gul-o-lāla haiñ musta.id be-takāñ

rafīqoñ ne rakkhī hathelī pe jaañ

har ik lab pe hai bas yahī ik suḳhan

hasīn aur dilkash hai arz-e-vatan

ḳhulūs aaj pāmāl hai aur tabāh

usuul aaj daryūza-ḳhvāh-e-panāh

giraftār-e-āzār duniyā hai aaj

mohabbat parīshān-o-rusvā hai aaj

usūl-e-mohabbat ke ham tarjumāñ

ḳhulūs-o-mohabbat ke ham pāsbāñ

divānoñ ko mutlaq nahīñ hai qarār

sadāqat se betāb dil pā.edār

har ik lab pe hai bas yahī ik suḳhan

hasīn aur dilkash hai arz-e-vatan

vatan hai ye nānak kā farmāñ-pazīr

thā gautam isī kārvāñ kā amiir

mohabbat ne rutba diyā hai buland

mohabbat ne sab ko kiyā arjumand

hai ġhairat kā tūfān chhāyā huā

hai bachchoñ meñ bhī josh aayā huā

irāde haiñ sab ke bahut ustuvār

ġhayūr aur bedār haiñ jāñ-nisār

har ik lab pe hai bas yahī ik suḳhan

hasīn aur dilkash hai arz-e-vatan

na dī dushmanoñ ko kabhī is ne raah

himāla hai rif.at se ālam-panāh

himāla kī dilchasp hai dāstāñ

ye azmat nishāñ sab kā hai pāsbāñ

zamāne pe ye baat hai āshkār

amā us kī hai duḳhtar-e-nām-dār

himāla kī azmat kī ham ko qasam

himāla kī rif.at kī ham ko qasam

hifāzat himāla kī ab farz hai

himāla kā ham par baḌā qarz hai

ye kahte haiñ sab mil ke ḳhurd-o-kalāñ

ki ġhairat kā is vaqt hai imtihāñ

huā rū-e-shañkar hai ġhusse se laal

dikhā.egā ab raqs tānDau jalāl

irāde haiñ sab ke bahut ustuvār

ġhayūr aur bedār sab jāñ-nisār

har ik lab pe hai bas yahī ik suḳhan

hasīn aur dilkash hai arz-e-vatan

muhāfiz haiñ ham amn ke lā-kalām

zamāne ko dete haiñ budh kā payām

sabā apne gulshan se jaatī hai jab

miTātī hai duniyā ke rañj-o-ta.ab

rasīlī hai sub.h aur rasīlī hai shaam

nihāñ in meñ hai zindagī kā payām

rivāyat kā mahfūz kar ke vaqār

hameñ lūTnā hai ḳhushī kī bahār

zarā dekhiyegā rafīqoñ kī aan

hai rakkhī jinhoñ ne hathelī pe jaan

har ik lab pe hai bas yahī ik suḳhan

hasīn aur dilkash hai arz-e-vatan

hai izzat kā jur.at kā ab imtihāñ

kahīñ jhuk na jaa.e vatan kā nishāñ

fareboñ se koī panaptā nahīñ

kabhī jhuuT kā meva paktā nahīñ

sadāqat kā hai bol-bālā sadā

nahīñ kaam aate daroġh iftirā

fazā hai chaman kī hameñ sāzgār

hai pābanda-tar is zamīñ kī bahār

har ik lab pe hai bas yahīñ ik suḳhan

hasīn aur dilkash hai arz-e-vatan

hayā aur muravvat hai jo pur raheñ

huī haiñ vo āñkheñ bahut ḳhashmagīñ

baḌhe haiñ vatan kī taraf bad-qimāsh

kaleja zamīñ kā huā paash paash

pahāḌoñ pe hai barf ġhusse se laal

fazā.eñ huiiñ garm ātish misāl

haiñ jehlam meñ aane ko tuġhyāniyāñ

har ik mauj par hai ġhazab kā samāñ

mohabbat kī duniyā ko dil meñ liye

bahār-e-javānī se paimāñ kiye

vatan kī hifāzat ko tayyār haiñ

mohabbat ke baada se sarshār haiñ

hifāzat hai farz apne armān kī

hameñ aaj parvā nahīñ jaan kī

har ik lab pe hai bas yahī ik suḳhan

hasīn aur dilkash hai arz-e-vatan

2

aao baḌho maidān meñ sheroñ dushman par yalġhār kareñ

qabr bane maidān meñ us kī aisā us par vaar kareñ

zañg na lagne paa.e apne bhārat kī āzādī ko

aao zer-e-dām kareñ sayyādoñ kī sayyādī ko

lauh-e-dil par naqsh karo har haal meñ zinda rahnā hai

mulk kī ḳhidmat ke raste meñ jo dukh aa.e sahnā hai

ye sailāb-e-surḳh nahīñ hai zulm-o-sitam kī āñdhī hai

is sailāb ko rokeñge ham himmat ham ne bāñdhī hai

sheroñ kī aulād ho tum in vīroñ kī santān ho tum

mard-e-mujāhid mard-e-jarī ho yodhdhā ho balvān ho tum

sāñchī madurā amaritsar ajmer kī azmat tum se hai

sub.h-e-banaras shām-e-avadh kī asl-o-haqīqat tum se hai

taaj ajantā aur elora ke vāhid fankār ho tum

ḳhush-sīrat ḳhush-sūrāt ḳhush-mūrat ḳhush-kirdār ho tum

bhīlā.ī chitranjan tum se bhākaḌ anañgal tum se hai

dāmodar kī shaan hai tum se azmat-e-chanbal tum se hai

tum ne basā.e shahr nirāle jañgal tum se mañgal haiñ

tum ne nikālī nahreñ itnī sahrā tum se jal-thal haiñ

tum ne itnī himmat se dariyāoñ ke ruḳh moḌ diye

tum ne khodīñ surañgeñ itnī duur ke rishte joḌ diye

tum kashmīr kī arz-e-hasīñ ke nazzāroñ meñ palte ho

kohsāroñ ko phāñdte ho tum dariyāoñ pe chalte ho

tum mysore meñ virindā-ban ke baaġh sajāne vaale ho

uuTī shimla dārjiling se shahr basāne vaale ho

tātya-Tope laxmī-bā.ī Tiipū kī aulād ho tum

jañg ke fan meñ qābil ho tum māhir ho ustād ho tum

hindū muslim sikh īsā.ī jainī bodh aur pārsī

dahqāñ tājir aur mulāzim sādhū-sant aur siyāsī

le ke vatan kā jhanDā aao dushman par yalġhār kareñ

qabr bane ran-bhūm meñ us kī aisā us par vaar kareñ

KHayalat mein saKHt hai intishaar

taKHayyul pareshan qalam be-qarar

jahan KHun-aluda-o-KHun-rang hai

watan par paDa saya-e-rang hai

gul-o-lala hain mustaid be-takan

rafiqon ne rakkhi hatheli pe jaan

har ek lab pe hai bas yahi ek suKHan

hasin aur dilkash hai arz-e-watan

KHulus aaj pamal hai aur tabah

usul aaj daryuza-KHwah-e-panah

giraftar-e-azar duniya hai aaj

mohabbat parishan-o-ruswa hai aaj

usul-e-mohabbat ke hum tarjuman

KHulus-o-mohabbat ke hum pasban

diwanon ko mutlaq nahin hai qarar

sadaqat se betab dil paedar

har ek lab pe hai bas yahi ek suKHan

hasin aur dilkash hai arz-e-watan

watan hai ye nanak ka farman-pazir

tha gautam isi karwan ka amir

mohabbat ne rutba diya hai buland

mohabbat ne sab ko kiya arjumand

hai ghairat ka tufan chhaya hua

hai bachchon mein bhi josh aaya hua

irade hain sab ke bahut ustuwar

ghayur aur bedar hain jaan-nisar

har ek lab pe hai bas yahi ek suKHan

hasin aur dilkash hai arz-e-watan

na di dushmanon ko kabhi is ne rah

himala hai rifat se aalam-panah

himala ki dilchasp hai dastan

ye azmat nishan sab ka hai pasban

zamane pe ye baat hai aashkar

ama us ki hai duKHtar-e-nam-dar

himala ki azmat ki hum ko qasam

himala ki rifat ki hum ko qasam

hifazat himala ki ab farz hai

himala ka hum par baDa qarz hai

ye kahte hain sab mil ke KHurd-o-kalan

ki ghairat ka is waqt hai imtihan

hua ru-e-shankar hai ghusse se lal

dikhaega ab raqs tanDau jalal

irade hain sab ke bahut ustuwar

ghayur aur bedar sab jaan-nisar

har ek lab pe hai bas yahi ek suKHan

hasin aur dilkash hai arz-e-watan

muhafiz hain hum amn ke la-kalam

zamane ko dete hain budh ka payam

saba apne gulshan se jati hai jab

miTati hai duniya ke ranj-o-tab

rasili hai subh aur rasili hai sham

nihan in mein hai zindagi ka payam

riwayat ka mahfuz kar ke waqar

hamein luTna hai KHushi ki bahaar

zara dekhiyega rafiqon ki aan

hai rakkhi jinhon ne hatheli pe jaan

har ek lab pe hai bas yahi ek suKHan

hasin aur dilkash hai arz-e-watan

hai izzat ka jurat ka ab imtihan

kahin jhuk na jae watan ka nishan

farebon se koi panapta nahin

kabhi jhuT ka mewa pakta nahin

sadaqat ka hai bol-baala sada

nahin kaam aate darogh iftira

faza hai chaman ki hamein sazgar

hai pabanda-tar is zamin ki bahaar

har ek lab pe hai bas yahin ek suKHan

hasin aur dilkash hai arz-e-watan

haya aur murawwat hai jo pur rahen

hui hain wo aankhen bahut KHashmagin

baDhe hain watan ki taraf bad-qimash

kaleja zamin ka hua pash pash

pahaDon pe hai barf ghusse se lal

fazaen huin garm aatish misal

hain jehlam mein aane ko tughyaniyan

har ek mauj par hai ghazab ka saman

mohabbat ki duniya ko dil mein liye

bahaar-e-jawani se paiman kiye

watan ki hifazat ko tayyar hain

mohabbat ke baada se sarshaar hain

hifazat hai farz apne arman ki

hamein aaj parwa nahin jaan ki

har ek lab pe hai bas yahi ek suKHan

hasin aur dilkash hai arz-e-watan

2

aao baDho maidan mein sheron dushman par yalghaar karen

qabr bane maidan mein us ki aisa us par war karen

zang na lagne pae apne bhaarat ki aazadi ko

aao zer-e-dam karen sayyaadon ki sayyaadi ko

lauh-e-dil par naqsh karo har haal mein zinda rahna hai

mulk ki KHidmat ke raste mein jo dukh aae sahna hai

ye sailab-e-surKH nahin hai zulm-o-sitam ki aandhi hai

is sailab ko rokenge hum himmat hum ne bandhi hai

sheron ki aulad ho tum in wiron ki santan ho tum

mard-e-mujahid mard-e-jari ho yodhdha ho balwan ho tum

sanchi madura amaritsar ajmer ki azmat tum se hai

subh-e-banaras sham-e-awadh ki asl-o-haqiqat tum se hai

taj ajanta aur elora ke wahid fankar ho tum

KHush-sirat KHush-suraat KHush-murat KHush-kirdar ho tum

bhilai chitranjan tum se bhakaD anangal tum se hai

damodar ki shan hai tum se azmat-e-chanbal tum se hai

tum ne basae shahr nirale jangal tum se mangal hain

tum ne nikali nahren itni sahra tum se jal-thal hain

tum ne itni himmat se dariyaon ke ruKH moD diye

tum ne khodin surangen itni dur ke rishte joD diye

tum kashmir ki arz-e-hasin ke nazzaron mein palte ho

kohsaron ko phandte ho tum dariyaon pe chalte ho

tum mysore mein wirinda-ban ke bagh sajaane wale ho

uTi shimla darjiling se shahr basane wale ho

tatya-Tope laxmi-bai Tipu ki aulad ho tum

jang ke fan mein qabil ho tum mahir ho ustad ho tum

hindu muslim sikh isai jaini bodh aur parsi

dahqan tajir aur mulazim sadhu-sant aur siyasi

le ke watan ka jhanDa aao dushman par yalghaar karen

qabr bane ran-bhum mein us ki aisa us par war karen