asir-e-zat-e-raushni

na lazzatoñ kā bahr thā na ḳhvāhishoñ kī vādiyāñ

na dā.ere azaab ke na zāviye savāb ke

bas ek raushnī asīr-e-zāt thī

muhīt kā.enāt thī azal se be-libās thī

to yuuñ huā ki daf.atan

mire badan ke pairahan meñ chhup ga.ī

to lazzatoñ kā bahr mauj-zan huā

to ḳhvāhishoñ kī vādiyāñ sulag ga.iiñ

to dā.ere azaab ke phisal ga.e

to zāviye savāb ke machal ga.e

ajiib vāqi.a nahīñ

mire badan kā pairahan to lazzatoñ ke taar meñ bunā gayā

vo ḳhvāhishoñ ke bahr meñ jo mauj mauj bah gayā

to kyā huā

ye raaz raaz rah gayā

vo raushnī jo qabl-e-irtikāb hī

mire badan ke pairahan meñ jāguzīñ thī

sad-irtikāb kyuuñ huī nahīñ

na lazzaton ka bahr tha na KHwahishon ki wadiyan

na daere azab ke na zawiye sawab ke

bas ek raushni asir-e-zat thi

muhit kaenat thi azal se be-libas thi

to yun hua ki dafatan

mere badan ke pairahan mein chhup gai

to lazzaton ka bahr mauj-zan hua

to KHwahishon ki wadiyan sulag gain

to daere azab ke phisal gae

to zawiye sawab ke machal gae

ajib waqia nahin

mere badan ka pairahan to lazzaton ke tar mein buna gaya

wo KHwahishon ke bahr mein jo mauj mauj bah gaya

to kya hua

ye raaz raaz rah gaya

wo raushni jo qabl-e-irtikab hi

mere badan ke pairahan mein jaguzin thi

sad-irtikab kyun hui nahin