ata-e-tauba liqa-e-tu

terī bātoñ meñ tirā fan tere fan meñ terī baat

kyuuñ ho tere baab meñ phir kāvish-e-zāt-o-sifāt

pahūñchī ġham kī ruuh tak jin kī na koī ek baat

ishq meñ jhele haiñ tū ne aise bhī kuchh sānehāt

zindagī ko zindagī karnā koī āsāñ na thā

hazm kar ke zahr ko tū ne kiyā āb-e-hayāt

hai kahāñ ehsās kī aisī riyāzat kā javāb

hotī hai garm-e-takallum tujh se behis kā.enāt

raaz ke sīġhe meñ rakkhā thā mashiyyat ne jinheñ

vo haqā.eq ban chuke haiñ tere dil kī vārdāt

terī bāteñ sun ke āñkhoñ meñ namī sī aa.e hai

terī mahfil hai buland-az-dahriyāt-o-dīniyāt

sirf usī kī tarjumānī hai tire ash.ār meñ

jis sukūt-e-rāz-e-rangīñ ko kaheñ jān-e-hayāt

terī bāteñ haiñ ki naġhme tere naġhme haiñ ki sehr

zeb dete haiñ bhalā auroñ ko kab ye kufriyāt

tū ne jis āvāz ko paalā hai mar mar kar 'firāq'

aaj usī kī narm lau hai sham-e-mehrāb-e-hayāt

teri baaton mein tera fan tere fan mein teri baat

kyun ho tere bab mein phir kawish-e-zat-o-sifat

pahunchi gham ki ruh tak jin ki na koi ek baat

ishq mein jhele hain tu ne aise bhi kuchh sanehat

zindagi ko zindagi karna koi aasan na tha

hazm kar ke zahr ko tu ne kiya aab-e-hayat

hai kahan ehsas ki aisi riyazat ka jawab

hoti hai garm-e-takallum tujh se behis kaenat

raaz ke sighe mein rakkha tha mashiyyat ne jinhen

wo haqaeq ban chuke hain tere dil ki wardat

teri baaten sun ke aankhon mein nami si aae hai

teri mahfil hai buland-az-dahriyat-o-diniyat

sirf usi ki tarjumani hai tere ashaar mein

jis sukut-e-raaz-e-rangin ko kahen jaan-e-hayat

teri baaten hain ki naghme tere naghme hain ki sehr

zeb dete hain bhala auron ko kab ye kufriyat

tu ne jis aawaz ko pala hai mar mar kar 'firaq'

aaj usi ki narm lau hai sham-e-mehrab-e-hayat