aur bhi dukh hain zamane mein mohabbat ke sawa

kitnā dilkash thā samāñ aaj se pahle pahle

kitnā rangīñ thā jahāñ aaj se pahle pahle

aaj nazdīk se dekhā jo zamāna maiñ ne

is ke har taur ko har rang ko jaanā maiñ ne

is ke sab rāz-e-nihāñ mujh pe 'ayāñ hone lage

zarre zarre se sitam is ke bayāñ hone lage

is kī ye doġhlī sūrat bhī nazar aane lagī

is kī badlī hai jo fitrat bhī samajh aane lagī

ye jahāñ tang hai tārīk hai tah-ḳhāna hai

qissa-e-ranj-o-alam dard kā afsāna hai

ashk āñkhoñ se yahāñ roz bahā karte haiñ

kitne dil ātish-e-furqat meñ jalā karte haiñ

maut kā ġham hai bichhaḌne kī sazā bhī hai yahāñ

jiite jī roz hī marne kā maza bhī hai yahāñ

bevgī bhī hai yatīmī hai buḌhāpā hai yahāñ

har ḳhushī ranj-o-alam kā hī sarāpā hai yahāñ

bhaa.ī ne bhaa.ī kā ġham haif uThāyā hai yahāñ

kitne apnoñ ko tah-e-ḳhāk sulāyā hai yahāñ

muflisī bhī hai yahāñ bhuuk hai lāchārī hai

nasl-e-insān pe insān kā ḳhuuñ taarī hai

kitnī āñkhoñ se javāñ sapne yahāñ TuuTe haiñ

kitne ghar ahl-e-siyāsat ne yahāñ luuTe haiñ

kitne jismoñ kī lagā kartī hai bolī har dam

khelī jaatī hai yahāñ ḳhuun kī holī har dam

aisī duniyā ki jahāñ saañs bhī lenā hai muhāl

aisī duniyā hai jahāñ harf-e-muravvat kā akaal

aisī duniyā ki jahāñ ġham kā hai saayā har pal

aisī duniyā ki jahāñ zulm hai chhāyā har pal

aisī duniyā ki jise dekh ke Dar jaate haiñ

log ġhurbat se kabhī bhuuk se mar jaate haiñ

aisī duniyā meñ ai duniyā mirī sansār mire

aisī duniyā meñ ai mahbūb ai ġham-ḳhvār mire

kyā huā dil bhī agar merā kabhī TuuT gayā

kyā huā jaan se pyārā bhī agar chhūT gayā

zindagī yuuñ bhī guzarnī hai guzar jā.egī

ek din yaad tirī dil se utar jā.egī

apne pyāroñ ko sabhī roz jahāñ khote haiñ

aisī duniyā meñ jahāñ aur bhī ġham hote haiñ

tujh ko khonā hī faqat ġham kī nishānī to nahīñ

tujh ko paanā hī masarrat kī kahānī to nahīñ

terī furqat se qayāmat to nahīñ utregī

tujh ko pā kar bhī ye duniyā to nahīñ badlegī

tū na hogā to ka.ī aur ġham-e-jāñ hoñge

dard ke roz na.e baab farozāñ hoñge

ai mirī jān-e-ġhazal ai mirī duniyā ke sukūñ

terī aur merī mohabbat hai faqat ek fusūñ

merī āñkhoñ ke sivā bhī to bahut kuchh hai yahāñ

tere aur mere binā bhī to daraḳhshāñ hai jahāñ

sūrat-e-qais na ban ḳhud ko yuuñ farhād na kar

ik mohabbat ke liye ziist ko barbād na kar

aur bhī dukh haiñ zamāne meñ mohabbat ke sivā

rāhateñ aur bhī haiñ vasl kī rāhat ke sivā

kitna dilkash tha saman aaj se pahle pahle

kitna rangin tha jahan aaj se pahle pahle

aaj nazdik se dekha jo zamana main ne

is ke har taur ko har rang ko jaana main ne

is ke sab raaz-e-nihan mujh pe 'ayan hone lage

zarre zarre se sitam is ke bayan hone lage

is ki ye doghli surat bhi nazar aane lagi

is ki badli hai jo fitrat bhi samajh aane lagi

ye jahan tang hai tarik hai tah-KHana hai

qissa-e-ranj-o-alam dard ka afsana hai

ashk aankhon se yahan roz baha karte hain

kitne dil aatish-e-furqat mein jala karte hain

maut ka gham hai bichhaDne ki saza bhi hai yahan

jite ji roz hi marne ka maza bhi hai yahan

bewgi bhi hai yatimi hai buDhapa hai yahan

har KHushi ranj-o-alam ka hi sarapa hai yahan

bhai ne bhai ka gham haif uThaya hai yahan

kitne apnon ko tah-e-KHak sulaya hai yahan

muflisi bhi hai yahan bhuk hai lachaari hai

nasl-e-insan pe insan ka KHun tari hai

kitni aankhon se jawan sapne yahan TuTe hain

kitne ghar ahl-e-siyasat ne yahan luTe hain

kitne jismon ki laga karti hai boli har dam

kheli jati hai yahan KHun ki holi har dam

aisi duniya ki jahan sans bhi lena hai muhaal

aisi duniya hai jahan harf-e-murawwat ka akal

aisi duniya ki jahan gham ka hai saya har pal

aisi duniya ki jahan zulm hai chhaya har pal

aisi duniya ki jise dekh ke Dar jate hain

log ghurbat se kabhi bhuk se mar jate hain

aisi duniya mein ai duniya meri sansar mere

aisi duniya mein ai mahbub ai gham-KHwar mere

kya hua dil bhi agar mera kabhi TuT gaya

kya hua jaan se pyara bhi agar chhuT gaya

zindagi yun bhi guzarni hai guzar jaegi

ek din yaad teri dil se utar jaegi

apne pyaron ko sabhi roz jahan khote hain

aisi duniya mein jahan aur bhi gham hote hain

tujh ko khona hi faqat gham ki nishani to nahin

tujh ko pana hi masarrat ki kahani to nahin

teri furqat se qayamat to nahin utregi

tujh ko pa kar bhi ye duniya to nahin badlegi

tu na hoga to kai aur gham-e-jaan honge

dard ke roz nae bab farozan honge

ai meri jaan-e-ghazal ai meri duniya ke sukun

teri aur meri mohabbat hai faqat ek fusun

meri aankhon ke siwa bhi to bahut kuchh hai yahan

tere aur mere bina bhi to daraKHshan hai jahan

surat-e-qais na ban KHud ko yun farhad na kar

ek mohabbat ke liye zist ko barbaad na kar

aur bhi dukh hain zamane mein mohabbat ke siwa

rahaten aur bhi hain wasl ki rahat ke siwa