aur bhi gham hain zamane mein

ai mirī jaañ mujhe is darja shikāyat se na dekh

aaj tak maiñ ne tire husn kī bāteñ kī haiñ

din guzāre haiñ tire ġham ke sahāre aksar

terī yādoñ se charāġhāñ ka.ī rāteñ kī haiñ

terī ḳhushbū se mahaktī haiñ fazā.eñ dil kī

ḳhāmushī hai tirī āvāz kā āhang liye

jo hasīñ shai hai mirī aañkh ke ā.īne meñ

terī shoḳhī tirī ra.anā.ī tirā rang liye

mere har sher meñ aahaT hai tire qadmoñ kī

mere har naqsh meñ pinhāñ hai tirā aks-e-shabāb

aaj lekin mirī jaañ hāl-e-dil-e-zār na pūchh

aaj kī raat mirī aañkh meñ kuchh aur haiñ ḳhvāb

tujh ko ma.alūm hai kis tarah tirī ulfat meñ

maiñ ne har dard har ik ranj bhulā rakkhā thā

ik taraf haT ke shab-o-roz ke hangāmoñ se

tere jalvoñ kā parī-ḳhāna sajā rakkhā thā

bhuul kar ġham-kada-e-zīst kī tārīkī ko

nūr-e-ummīd se shāmoñ ko jalā rakhā thā

kahīñ dāman meñ liye phirtā thā ḳhurshīd ko saath

āstīñ meñ kahīñ mahtāb chhupā rakhā thā

lekin ai jān-e-vafā jān-e-tarab jān-e-umīd

dil pe ik dard-e-pur-āshob kī yalġhār hai aaj

ḳhirman-e-harf-o-navā ko hai bachānā mushkil

be-amāñ sho.ala-e-betābi-e-iz.hār hai aaj

har añdhere ko tamanna hai sulag uThne kī

har ḳhamoshī ko sadā banñe pe isrār hai aaj

har-nafas meñ hai mire dhaar kisī ḳhanjar kī

har qadam meñ mire zanjīr kī jhankār hai aaj

aaj ik aur hī aalam hai mirī nazroñ meñ

jis kā har zarra hai vāmāñdgī-e-ġham se niDhāl

jis ke tārīk ḳharāboñ meñ haiñ barbād vo log

jin ko ulfat kā hai yaarā na masarrat kī majāl

jin kī āñkhoñ meñ faqat zulmat-e-fardā ke haiñ ḳhvāb

jin ke chehroñ pe faqat sāya-e-andoh-o-malāl

aaj kī shab koī afsāna-e-dilkash mat chheḌ

merī āñkhoñ ko yūñhī ashk-fishāñ rahne de

mere sapne meñ dahakne de yahī ġham kā alaav

mere chehre pe udāsī kā dhuāñ rahne de

kal vahī naġhma jagā lūñgā laboñ par apne

aaj kī raat mujhe mahv-e-fuġhāñ rahne de

tujh ko ma.alūm hai kuchh ai mirī ḳhushiyoñ kī rafīq

ġham-e-daurāñ mirī tanhā.ī se kyā kahtā hai

jin hasīñ lamhoñ se ham bunte haiñ ḳhushiyāñ apnī

in meñ kitnoñ kī tamannāoñ kā ḳhuuñ bahtā hai

laakh bahlā.ūñ maiñ dil ko tirī ulfat se magar

saaya ik mere tabassum meñ basā rahtā hai

aaj kī raat isī sāya-e-be-nām ke naam

aaj kī raat faqat nāla-e-mātam hī sahī

gul-e-pazhmurda pe chup-chāp luTāne ke liye

kīsa-e-chashm meñ sarmāya-e-shabnam hī sahī

aur bhī ġham haiñ zamāne meñ mohabbat ke sivā

aaj kī shab mujhe karne de zarā un kā hisāb

ai mirī jaañ mujhe is darja shikāyat se na dekh

aaj kī raat mirī aañkh meñ kuchh aur haiñ ḳhvāb

ai meri jaan mujhe is darja shikayat se na dekh

aaj tak main ne tere husn ki baaten ki hain

din guzare hain tere gham ke sahaare aksar

teri yaadon se charaghan kai raaten ki hain

teri KHushbu se mahakti hain fazaen dil ki

KHamushi hai teri aawaz ka aahang liye

jo hasin shai hai meri aankh ke aaine mein

teri shoKHi teri ranai tera rang liye

mere har sher mein aahaT hai tere qadmon ki

mere har naqsh mein pinhan hai tera aks-e-shabab

aaj lekin meri jaan haal-e-dil-e-zar na puchh

aaj ki raat meri aankh mein kuchh aur hain KHwab

tujh ko malum hai kis tarah teri ulfat mein

main ne har dard har ek ranj bhula rakkha tha

ek taraf haT ke shab-o-roz ke hangamon se

tere jalwon ka pari-KHana saja rakkha tha

bhul kar gham-kada-e-zist ki tariki ko

nur-e-ummid se shamon ko jala rakha tha

kahin daman mein liye phirta tha KHurshid ko sath

aastin mein kahin mahtab chhupa rakha tha

lekin ai jaan-e-wafa jaan-e-tarab jaan-e-umid

dil pe ek dard-e-pur-ashob ki yalghaar hai aaj

KHirman-e-harf-o-nawa ko hai bachana mushkil

be-aman shoala-e-betabi-e-izhaar hai aaj

har andhere ko tamanna hai sulag uThne ki

har KHamoshi ko sada banne pe israr hai aaj

har-nafas mein hai mere dhaar kisi KHanjar ki

har qadam mein mere zanjir ki jhankar hai aaj

aaj ek aur hi aalam hai meri nazron mein

jis ka har zarra hai wamandgi-e-gham se niDhaal

jis ke tarik KHarabon mein hain barbaad wo log

jin ko ulfat ka hai yara na masarrat ki majal

jin ki aankhon mein faqat zulmat-e-farda ke hain KHwab

jin ke chehron pe faqat saya-e-andoh-o-malal

aaj ki shab koi afsana-e-dilkash mat chheD

meri aankhon ko yunhi ashk-fishan rahne de

mere sapne mein dahakne de yahi gham ka alaw

mere chehre pe udasi ka dhuan rahne de

kal wahi naghma jaga lunga labon par apne

aaj ki raat mujhe mahw-e-fughan rahne de

tujh ko malum hai kuchh ai meri KHushiyon ki rafiq

gham-e-dauran meri tanhai se kya kahta hai

jin hasin lamhon se hum bunte hain KHushiyan apni

in mein kitnon ki tamannaon ka KHun bahta hai

lakh bahlaun main dil ko teri ulfat se magar

saya ek mere tabassum mein basa rahta hai

aaj ki raat isi saya-e-be-nam ke nam

aaj ki raat faqat nala-e-matam hi sahi

gul-e-pazhmurda pe chup-chap luTane ke liye

kisa-e-chashm mein sarmaya-e-shabnam hi sahi

aur bhi gham hain zamane mein mohabbat ke siwa

aaj ki shab mujhe karne de zara un ka hisab

ai meri jaan mujhe is darja shikayat se na dekh

aaj ki raat meri aankh mein kuchh aur hain KHwab