aur main bench pe akeli baiThi hun

bārishoñ kā haath thāme aaj maiñ ne bahut der tak walk kī

bench pe baiTh kar dhīre dhīre lambe gahre saañs liye

aur phir kaafī der tak āñkheñ tumhāre chehre pe jamā.e baiThī rahī

binā kisī vaj.h ke maiñ hañsī aur der tak hañstī rahī

tanhā.ī kā canvas bahut vasī.a hai

magar ek mukammal ḳhāmoshī use sairāb karne ko kaafī hai

guftugū kī ḳhvāhish hī rahī

samā.ateñ sairāb haiñ aur bīnā.ī jāgtī hai

tumhāre naam kuchh chiTThiyāñ kab se likh ke rakhīñ thiiñ

aaj havā ke sipurd kar diiñ

jāntī huuñ fāsla nā-qābil-e-tasḳhīr hai

magar dil hai ki apnī man-māniyāñ kartā un fāsloñ ko palak jhapakne meñ tai kartā jaatā hai

aur maiñ bench pe akelī baiThī huuñ

barishon ka hath thame aaj main ne bahut der tak walk ki

bench pe baiTh kar dhire dhire lambe gahre sans liye

aur phir kafi der tak aankhen tumhaare chehre pe jamae baiThi rahi

bina kisi wajh ke main hansi aur der tak hansti rahi

tanhai ka canwas bahut wasia hai

magar ek mukammal KHamoshi use sairab karne ko kafi hai

guftugu ki KHwahish hi rahi

samaaten sairab hain aur binai jagti hai

tumhaare nam kuchh chiTThiyan kab se likh ke rakhin thin

aaj hawa ke sipurd kar din

jaanti hun fasla na-qabil-e-tasKHir hai

magar dil hai ki apni man-maniyan karta un faslon ko palak jhapakne mein tai karta jata hai

aur main bench pe akeli baiThi hun