aur main chup raha

mere hāthoñ se merī chitā ban ga.ī

mere kāñdhoñ pe merā janāza uThā

nok-e-mizhgāñ se qirtās-ayyām par

mere ḳhuuñ se mirā naam likkhā gayā

aur maiñ chup rahā

mere bāzār kūche mire bām-o-dar

merī nādāriyoñ se sajā.e ga.e

mere afkār merī mata-e-hunar

merī mahrūmiyoñ se basā.e ga.e

aur maiñ chup rahā

merī taqdīr kā jo bhī ḳhāka banā

piile mausam ke pattoñ pe likkhā gayā

merī tasvīr mujh se chhupā.ī ga.ī

mujh ko nādīda ḳhvāboñ meñ dekhā gayā

aur maiñ chup rahā

mere alfāz ma.anī kī talvār se

sar-burīda hue gungunāte rahe

mere naġhme gadāoñ meñ bāñTe ga.e

barguzīda hue gungunāte rahe

aur maiñ chup rahā

mujh se merī tamannā ke gul chhīn kar

zard mausam ne jashn-e-bahārāñ kiyā

barf mere nasheman pe aa ke girī

dhuup niklī to is ko hirāsāñ kiyā

aur maiñ chup rahā

mere sarsabz jañgal ujāḌe ga.e

merī jhīloñ meñ ajgar basā.e ga.e

koh-e-mārāñ kī taqdīs luuTī ga.ī

be-hisī ke maqābir sajā.e ga.e

aur maiñ chup rahā

mere hathon se meri chita ban gai

mere kandhon pe mera janaza uTha

nok-e-mizhgan se qirtas-ayyam par

mere KHun se mera nam likkha gaya

aur main chup raha

mere bazar kuche mere baam-o-dar

meri nadariyon se sajae gae

mere afkar meri mata-e-hunar

meri mahrumiyon se basae gae

aur main chup raha

meri taqdir ka jo bhi KHaka bana

pile mausam ke patton pe likkha gaya

meri taswir mujh se chhupai gai

mujh ko nadida KHwabon mein dekha gaya

aur main chup raha

mere alfaz mani ki talwar se

sar-burida hue gungunate rahe

mere naghme gadaon mein banTe gae

barguzida hue gungunate rahe

aur main chup raha

mujh se meri tamanna ke gul chhin kar

zard mausam ne jashn-e-bahaaran kiya

barf mere nasheman pe aa ke giri

dhup nikli to is ko hirasan kiya

aur main chup raha

mere sarsabz jangal ujaDe gae

meri jhilon mein ajgar basae gae

koh-e-maran ki taqdis luTi gai

be-hisi ke maqabir sajae gae

aur main chup raha