aurat

falsafī tujh ko samajhte haiñ numūd-e-be-būd

ulmā kahte haiñ sarmāya-e-ishrat tujh ko

ahl-e-tārīḳh batāte haiñ ki aqvām-e-ġhayūr

mānte aa.e haiñ ik hisn-e-hamīyat tujh ko

bech kar jaan ḳharīdār tire hote haiñ

be-bahā jānte haiñ ahal-e-shujā.at tujh ko

koī kahtā hai ilāj-e-maraz-e-tanhā.ī

koī kahtā hai dalīl-e-rah-e-iffat tujh ko

hūr-e-jannat hai kisī ke liye lekin koī

chāh-e-bābil kī samajhtā hai haqīqat tujh ko

tere jaur-o-sitam-o-nāz-o-talavvun ke qatīl

kaañp kar kahte haiñ nairangī-e-qismat tujh ko

koī kahtā hai tujhe sāya-e-bed-e-larzāñ

koī kahtā hai magar sarv-e-nazākat tujh ko

husn-e-sīrat pe nazar jin kī ga.ī kahte haiñ

kabhī ismat kī kabhī sharm kī mūrat tujh ko

vasl aur hijr ke aalam kā kabhī kar ke ḳhayāl

jaan kahtā hai koī jaan kī zahmat tujh ko

ai do-rangī-e-zamāna kī mujassam tasvīr

U’rafā kahte haiñ ā.īna-e-ibrat tujh ko

dekhtā huuñ tirī sūrat ko ba-chashm-e-hairat

kuchh batā tū hī ki maiñ kyā kahūñ aurat tujh ko

falsafi tujh ko samajhte hain numud-e-be-bud

ulma kahte hain sarmaya-e-ishrat tujh ko

ahl-e-tariKH batate hain ki aqwam-e-ghayur

mante aae hain ek hisn-e-hamiyat tujh ko

bech kar jaan KHaridar tere hote hain

be-baha jaante hain ahal-e-shujaat tujh ko

koi kahta hai ilaj-e-maraz-e-tanhai

koi kahta hai dalil-e-rah-e-iffat tujh ko

hur-e-jannat hai kisi ke liye lekin koi

chah-e-babil ki samajhta hai haqiqat tujh ko

tere jaur-o-sitam-o-naz-o-talawwun ke qatil

kanp kar kahte hain nairangi-e-qismat tujh ko

koi kahta hai tujhe saya-e-bed-e-larzan

koi kahta hai magar sarw-e-nazakat tujh ko

husn-e-sirat pe nazar jin ki gai kahte hain

kabhi ismat ki kabhi sharm ki murat tujh ko

wasl aur hijr ke aalam ka kabhi kar ke KHayal

jaan kahta hai koi jaan ki zahmat tujh ko

ai do-rangi-e-zamana ki mujassam taswir

U’rafa kahte hain aaina-e-ibrat tujh ko

dekhta hun teri surat ko ba-chashm-e-hairat

kuchh bata tu hi ki main kya kahun aurat tujh ko