aurat ki haisiyat

maiñ aurat huuñ taḳhlīq-e-jahāñ kā ik sabab bhī huuñ

maiñ bilkul be-talab huuñ aur zamāne kī talab bhī huuñ

maiñ devī pyaar kī huuñ husn hī merā vasīla hai

ḳhulūs-o-sādgī zevar vafā merā qabīla hai

hunar jiine kā baḳhshā ilm kā parcham bhī lahrāyā

pale haiñ god meñ merī jinhoñ ne martaba paayā

vafādārī mohabbat hī faqat merā havāla hai

mirī aqdār kā ham-sar faqat koh-e-himāla hai

paḌhā hai 'mīr'-o-'ġhālib' 'ismat'-o-'manto' ko bhī maiñ ne

ye rangoñ meñ basī har dāstāñ goyā likhī maiñ ne

bahut farsūda rasmoñ par jalā.ī bhī ga.ī huuñ maiñ

qadāmat ke tarīqoñ se satā.ī bhī ga.ī huuñ maiñ

tijārat bhī mirī hotī rahī tohmat sahī maiñ ne

guzārī hai bahut marmar ke goyā zindagī maiñ ne

anā kī bheñT chaḌh kar aag ke sho.aloñ meñ jaltī huuñ

zamīñ meñ dafn ho jaatī huuñ aur be-maut martī huuñ

byāhī jaatī huuñ qur.ān se bhī maiñ yahāñ ab tak

ki zinda hai yahāñ par kārobārī kā jahāñ ab tak

bahut hī past huuñ aur lā.eq-e-dushnām huuñ maiñ hī

zinā bil-jabr meñ bhī morid-e-ilzām huuñ maiñ hī

maiñ insāñ huuñ farishta aur valī maiñ bhī nahīñ koī

ḳhatā kartī huuñ gangā kī dhulī maiñ bhī nahīñ koī

ki sabr-o-shukr se māmūr hai īsār se bhī dil

magar āḳhir ko thak jaatā hai yuuñ āzār se bhī dil

nahīñ darkār koī martaba daulat na zar mujh ko

ḳhudāvandā mirī qurbāniyoñ kā de ajr mujh ko

main aurat hun taKHliq-e-jahan ka ek sabab bhi hun

main bilkul be-talab hun aur zamane ki talab bhi hun

main dewi pyar ki hun husn hi mera wasila hai

KHulus-o-sadgi zewar wafa mera qabila hai

hunar jine ka baKHsha ilm ka parcham bhi lahraya

pale hain god mein meri jinhon ne martaba paya

wafadari mohabbat hi faqat mera hawala hai

meri aqdar ka ham-sar faqat koh-e-himala hai

paDha hai 'mir'-o-'ghaalib' 'ismat'-o-'manto' ko bhi main ne

ye rangon mein basi har dastan goya likhi main ne

bahut farsuda rasmon par jalai bhi gai hun main

qadamat ke tariqon se satai bhi gai hun main

tijarat bhi meri hoti rahi tohmat sahi main ne

guzari hai bahut marmar ke goya zindagi main ne

ana ki bhenT chaDh kar aag ke shoalon mein jalti hun

zamin mein dafn ho jati hun aur be-maut marti hun

byahi jati hun quran se bhi main yahan ab tak

ki zinda hai yahan par karobari ka jahan ab tak

bahut hi past hun aur laeq-e-dushnam hun main hi

zina bil-jabr mein bhi morid-e-ilzam hun main hi

main insan hun farishta aur wali main bhi nahin koi

KHata karti hun ganga ki dhuli main bhi nahin koi

ki sabr-o-shukr se mamur hai isar se bhi dil

magar aaKHir ko thak jata hai yun aazar se bhi dil

nahin darkar koi martaba daulat na zar mujh ko

KHudawanda meri qurbaniyon ka de ajr mujh ko