aurat

mahram-e-rāz dil-navāz hai tū

naġhma-e-zindagī kā saaz hai tū

kahāñ phūloñ meñ aisī ra.anā.ī

jaisī qudrat se tū ne hai paa.ī

tere dam se hai ye jahāñ gulzār

tū ne baḳhshī hai is chaman ko bahār

tū hai ik phuul ḳhushnumā shādāb

mehr-o-mah kā hai tū zamīñ pe javāb

tū ne dī is chaman ko ra.anā.ī

tū ne phūloñ ko baḳhshī zebā.ī

qābil-e-qadr hai tirī hastī

log kyoñ tujh pe karte haiñ saḳhtī

tū jahāñ meñ vafā kī devī hai

sharm-o-ḳhalq-o-hayā kī devī hai

saḳhtiyāñ kis qadar uThātī hai

harf-e-shikva na lab pe laatī hai

raunaq-e-bazm-e-kā.enāt hai tū

aur sar-chashma-e-hayāt hai tū

tū na hotī to ye jahān-e-ḳharāb

hotā dozaḳh kā is zamīñ pe javāb

itnī mardoñ ko de ḳhudā taufīq

qadr terī kareñ banā ke rafīq

mahram-e-raaz dil-nawaz hai tu

naghma-e-zindagi ka saz hai tu

kahan phulon mein aisi ranai

jaisi qudrat se tu ne hai pai

tere dam se hai ye jahan gulzar

tu ne baKHshi hai is chaman ko bahaar

tu hai ek phul KHushnuma shadab

mehr-o-mah ka hai tu zamin pe jawab

tu ne di is chaman ko ranai

tu ne phulon ko baKHshi zebai

qabil-e-qadr hai teri hasti

log kyon tujh pe karte hain saKHti

tu jahan mein wafa ki dewi hai

sharm-o-KHalq-o-haya ki dewi hai

saKHtiyan kis qadar uThati hai

harf-e-shikwa na lab pe lati hai

raunaq-e-bazm-e-kaenat hai tu

aur sar-chashma-e-hayat hai tu

tu na hoti to ye jahan-e-KHarab

hota dozaKH ka is zamin pe jawab

itni mardon ko de KHuda taufiq

qadr teri karen bana ke rafiq