aurten nahin jaantin

dil kī dīvāroñ se

udāsī ko khurach kar

ek nazm meñ ikaTThā karnā

auratoñ kā pasandīda khel nahīñ

auratoñ ko vo khel pasand nahīñ

jin ke āḳhir meñ tāliyāñ na bajā.ī jā sakeñ

auratoñ ko pasand nahīñ

log jo apnā dil

TukḌe kar ke pheñk rahe hote haiñ

jo zindagī kī kitāb meñ

hāshiyoñ par darj hote haiñ

aur fōtnote se uupar jhāñkne kī

koshish karte rahte haiñ

jo kisī kāġhaz ke TukḌe par

tahrīr kar ke pheñk dete haiñ

maiñ tumhāre baġhair nahīñ rah saktā

nahīñ jāntī haiñ aurteñ

koī saada sī satar

kāġhaz par kitnī darashtī se likhī jā saktī hai

ārām se paḌh jaatī haiñ vo

nahīñ jāntī haiñ aurteñ

khurdure lafzoñ se kaaTī huī zindagī

tez aañch par rakhe hue dil

āñkhoñ meñ

bahut gahrā dekhtī huī āñkheñ

aur ek khel

dil kī dīvāroñ se

udāsī ko khurach kar

ek nazm meñ ikaTThā karne kā

dil ki diwaron se

udasi ko khurach kar

ek nazm mein ikaTTha karna

auraton ka pasandida khel nahin

auraton ko wo khel pasand nahin

jin ke aaKHir mein taliyan na bajai ja saken

auraton ko pasand nahin

log jo apna dil

TukDe kar ke phenk rahe hote hain

jo zindagi ki kitab mein

hashiyon par darj hote hain

aur footnote se upar jhankne ki

koshish karte rahte hain

jo kisi kaghaz ke TukDe par

tahrir kar ke phenk dete hain

main tumhaare baghair nahin rah sakta

nahin jaanti hain aurten

koi sada si satar

kaghaz par kitni darashti se likhi ja sakti hai

aaram se paDh jati hain wo

nahin jaanti hain aurten

khurdure lafzon se kaTi hui zindagi

tez aanch par rakhe hue dil

aankhon mein

bahut gahra dekhti hui aankhen

aur ek khel

dil ki diwaron se

udasi ko khurach kar

ek nazm mein ikaTTha karne ka