autograph

khilāḌiyoñ ke ḳhud-navisht dastaḳhat ke vāste kitābche liye hue

khaḌī haiñ muntazir hasīn laḌkiyāñ

Dhalakte āñchaloñ se be-ḳhabar hasīn laḌkiyāñ

muhīb phāTakoñ ke Dolte quarter chīḳh uThe

ubal paḌe ulajhte bāzuoñ chaTaḳhtī pasliyoñ ke pur-hirās qāfile

gire baḌhe muḌe bhañvar hujūm ke

khaḌī haiñ ye bhī rāste pe ik taraf bayāz-e-ārzū-ba-kaf

nazar nazar meñ nā-rasā parastishoñ kī dāstāñ

laraz rahā hai dam-ba-dam kamān ābrūoñ kā ḳham

koī jab ek nāz-e-be-niyāz se kitābchoñ pe khīñchtā chalā gayā

Hurūf-e-kaj-tarāsh kī lakīr sī

to tham ga.iiñ laboñ pe muskurāhaTeñ sharīr sī

kisī aziim shaḳhsiyat kī tamkanat

hinā.ī uñgliyoñ pe kāñpte varaq pe jhuk ga.ī

to zar-nigār palluoñ se jhāñktī kalā.iyoñ kī tez nabz ruk ga.ī

vo bowler ek mahvashoñ ke jamghaTe meñ ghir gayā vo safha-e-bayāz par

ba-sad ġhurūr kilk-e-gauharīñ phireñ

hasīn jhilmilāhaToñ ke darmiyāñ wicket girī

maiñ ajnabī maiñ be-nishāñ maiñ pā-ba-gil

na rif.at-e-maqām hai na shohrat-e-davām hai ye lauh-e-dil pe lauh-e-dil

na us pe koī naqsh hai na us pe koī naam hai

khilaDiyon ke KHud-nawisht dastaKHat ke waste kitabche liye hue

khaDi hain muntazir hasin laDkiyan

Dhalakte aanchalon se be-KHabar hasin laDkiyan

muhib phaTakon ke Dolte quarter chiKH uThe

ubal paDe ulajhte bazuon chaTaKHti pasliyon ke pur-hiras qafile

gire baDhe muDe bhanwar hujum ke

khaDi hain ye bhi raste pe ek taraf bayaz-e-arzu-ba-kaf

nazar nazar mein na-rasa parastishon ki dastan

laraz raha hai dam-ba-dam kaman aabruon ka KHam

koi jab ek naz-e-be-niyaz se kitabchon pe khinchta chala gaya

Huruf-e-kaj-tarash ki lakir si

to tham gain labon pe muskurahaTen sharir si

kisi azim shaKHsiyat ki tamkanat

hinai ungliyon pe kanpte waraq pe jhuk gai

to zar-nigar palluon se jhankti kalaiyon ki tez nabz ruk gai

wo bowler ek mahwashon ke jamghaTe mein ghir gaya wo safha-e-bayaz par

ba-sad ghurur kilk-e-gauharin phiren

hasin jhilmilahaTon ke darmiyan wicket giri

main ajnabi main be-nishan main pa-ba-gil

na rifat-e-maqam hai na shohrat-e-dawam hai ye lauh-e-dil pe lauh-e-dil

na us pe koi naqsh hai na us pe koi nam hai