awami subh

avāmī sub.h phir aa.ī

zamīñ ne kar liyā ruḳh apnā

phir sūraj ke us nuqte kī jānib

jahāñ yārān-e-ham-majlis ne ummīdoñ kī kirnoñ kā

suhānā ruup dekhā thā

ka.ī sadiyoñ kī zulmat kī tahoñ se

kuñvārī dhuup kā ghuñghaT uThāyā thā

qafas kī khapchiyoñ par leT kar āzād āñkhoñ se

ka.ī sapne bune the

jahāñ se ik na.e ehsās kā haalā milā thā

na.ī sochoñ kā darvāza khulā thā

vahī ham the

ki apne hākimoñ ke vāste marte chale the

vahī ham the

ki jin par zindagī karne kā uqda khul chukā thā

avāmī sub.h phir aa.ī

barābar aa rahī hai

zamīñ har saal is din kā

i.aada kar rahī hai

magar sūraj kā vo nuqta

jo is din kā muharrik thā

na jaane kyoñ

mujhe kuchh ajnabī sā lag rahā hai

awami subh phir aai

zamin ne kar liya ruKH apna

phir suraj ke us nuqte ki jaanib

jahan yaran-e-ham-majlis ne ummidon ki kirnon ka

suhana rup dekha tha

kai sadiyon ki zulmat ki tahon se

kunwari dhup ka ghunghaT uThaya tha

qafas ki khapchiyon par leT kar aazad aankhon se

kai sapne bune the

jahan se ek nae ehsas ka haala mila tha

nai sochon ka darwaza khula tha

wahi hum the

ki apne hakimon ke waste marte chale the

wahi hum the

ki jin par zindagi karne ka uqda khul chuka tha

awami subh phir aai

barabar aa rahi hai

zamin har sal is din ka

iada kar rahi hai

magar suraj ka wo nuqta

jo is din ka muharrik tha

na jaane kyon

mujhe kuchh ajnabi sa lag raha hai