azab

mujhe shak kī nazroñ se kyuuñ dekhte ho

mirī baat sach hai

mirī baat sach hai maiñ kal raat nāgoñ se laḌtā rahā huuñ

kanhaiyā nahīñ maiñ jo nāgoñ ko nath luuñ

maiñ aisā baḌā koī insān kab huuñ

jo harf-e-shikāyat bhī lab par na laa.e

na jo ye kahe

maiñ to bas baaz aayā

vo gorīla faujeñ haiñ yā naag kaale

nikalte hī din ke vo jaate kahāñ haiñ

ye kis ko ḳhabar din meñ rahte kahāñ haiñ

lipaTte haiñ rātoñ ko is tarah mujh se

amarbel peḌoñ kī shāḳhoñ se jaise

vo rah rah ke shāḳhoñ se jaise

vo rah rah ke phunkārnā un kā tauba

ki ḳhud-kār bandūq kī goliyāñ huuñ

maiñ un se nikal bhāgnā chāhtā huuñ

mirā jism zindāñ hai bebas huuñ is meñ

koī dev qad beḌiyoñ meñ ho jaise

mirī baat sach hai

mirī baat sach hai nahīñ hai kisī jañg kā ye fasāna

haqīqat hai ye us ko dhokā na samjho

havā pichhlī rātoñ meñ kyā kuchh na pūchho

nigaltā hai jab bhī añdhere kā ajgar

makīnoñ makānoñ ko dīvār-o-dar ko

nigaltā hai ifrīt jab ḳhāmushī kā

sadāoñ kā jañgal navāoñ kī nagrī

vo aise meñ aate haiñ jaane kahāñ se

achānak maiñ ghabrā ke uTh baiThtā huuñ

kisāñ ḳhvāb meñ dekh kar aag jaise

sar-e-kisht ghabrā ke uTh baiThtā hai

jo haiñ silvaTeñ mere bistar meñ sad.hā

vo sāñpoñ ke andāz meñ reñgtī haiñ

mirī sej sāñpoñ kā maskan banī hai

mujhe shak ki nazron se kyun dekhte ho

meri baat sach hai

meri baat sach hai main kal raat nagon se laDta raha hun

kanhaiya nahin main jo nagon ko nath lun

main aisa baDa koi insan kab hun

jo harf-e-shikayat bhi lab par na lae

na jo ye kahe

main to bas baz aaya

wo gorila faujen hain ya nag kale

nikalte hi din ke wo jate kahan hain

ye kis ko KHabar din mein rahte kahan hain

lipaTte hain raaton ko is tarah mujh se

amarbel peDon ki shaKHon se jaise

wo rah rah ke shaKHon se jaise

wo rah rah ke phunkarna un ka tauba

ki KHud-kar banduq ki goliyan hun

main un se nikal bhagna chahta hun

mera jism zindan hai bebas hun is mein

koi dew qad beDiyon mein ho jaise

meri baat sach hai

meri baat sach hai nahin hai kisi jang ka ye fasana

haqiqat hai ye us ko dhoka na samjho

hawa pichhli raaton mein kya kuchh na puchho

nigalta hai jab bhi andhere ka ajgar

makinon makanon ko diwar-o-dar ko

nigalta hai ifrit jab KHamushi ka

sadaon ka jangal nawaon ki nagri

wo aise mein aate hain jaane kahan se

achanak main ghabra ke uTh baiThta hun

kisan KHwab mein dekh kar aag jaise

sar-e-kisht ghabra ke uTh baiThta hai

jo hain silwaTen mere bistar mein sadha

wo sanpon ke andaz mein rengti hain

meri sej sanpon ka maskan bani hai