azm

ba-vaqt-e-asr azaañ gūñjtī hai sahrā meñ

namāz ḳhud hī musallā bichhāne aa.ī hai

baḌā ajiib thā manzar

ajiib raat thī vo

havā.eñ sahmī huī thiiñ charāġh chup chup the

har ek samt vahī be-karāñ sī ḳhāmoshī

fazā udaas

vahī nīm-jāñ sī ḳhāmoshī

sukūt-e-shab meñ bhī aahaT thī inqilāboñ kī

sajī thī bazm vahāñ āsmāñ-janāboñ kī

bahut sī bāteñ thiiñ aur koī baat thī hī nahīñ

phir us ke ba.ad koī raat

raat thī hī nahīñ

vo raat jab bhī kabhī yaad aane lagtī hai

to raushnī hameñ rasta dikhāne lagtī hai

us ek shab meñ murattab huā nisāb-e-vafā

likhī ga.ī thī usī raat meñ kitāb-e-vafā

us ek raat ko tahrīr koī kaise kare

ḳhayāl-o-fikr ko zanjīr koī kaise kare

lahū ke ḳhvāb kī ta.abīr koī kaise kare

safar thā kaisā vo kaisī masāfat-e-shab thī

koī batā.e to

kaisī vo sā.at-e-shab thī

mutālibāt-e-sharī.at bahut ziyāda the

aur us ke paas faqat ek shab kī mohlat thī

us ek shab meñ use kitne kaam karne the

use sikhānā thā insāñ ko bandagī kā shu.ūr

tilāvatoñ kā qarīna suḳhanvarī kā shu.ūr

vo ek raat thī aisī

ki qadr-o-isrā ne

nazar jo apnī jamā.ī to phir haTā.ī nahīñ

vo regzār ke siine pe nasb ik ḳhema

lahū se sabr kī tārīḳh likhne vaalā thā

bujhā bujhā sā khaḌā thā vo pāsbān-e-charāġh

magar darūn meñ is ke bahut ujālā thā

vo jāntā thā vafādār haiñ sabhī nāsir

vo sar kaTā.eñge lekin na saath chhoḌeñge

charāg-e-ḳhema bujhāne kā ye na thā maqsad

ki us ko yāvar-e-ansār ko parakhnā thā

vo raushnī meñ unheñ laanā chāhtā thā faqat

samajh rahā thā vo qudrat ke har ishāre ko

sadā.eñ detī rahī us ko daulat-e-duniyā

kahāñ vo sabr kahāñ jabr-o-shaukat-e-duniyā

magar vo ek sadā

āsmāñ se aatī huī

batā rahī thī

ki kyā āsmān chāhtā hai

ḳhudā-e-pāk koī imtihān chāhtā hai

isī liye koī sahrā kī samt baḌhtā rahā

lahū lahū kisī dariyā kī samt baḌhtā rahā

vo raushnī kī alāmat

vo bāniyān-e-charāġh

samajh rahā thā bujhegā ye ḳhāndān-e-charāġh

ajiib log the vo ḳhāndān-e-nūr ke log

the sab ke ek se lahje

kalām yaksāñ the

ḳhilāf-e-zulm sabhī ke payām yaksāñ the

bahut hī ġhaur se har chehra paḌh rahe the husain

ki aane vaalā har ik lamha paḌh rahe the husain

vo ek raat bhī dekho guzar hī jaatī hai

savere ma.arka hotā hai haqq-o-bātil meñ

ajiib josh hai jazba hai jāñ-nisāroñ meñ

vaqār-e-tishna-labī ko gale lagā.e hue

guzar rahā hai qabīla lahū ke dariyā se

ba-vaqt-e-asr azaañ gūñjtī hai sahrā meñ

namāz ḳhud hī musallā bichhāne aa.ī hai

sar-e-husain adā kar rahā hai sajda-e-shukr

gulū-e-ḳhushk pe ḳhanjar kī dhaar chaltī hai

paḌhā thā jis ne kabhī

kullu man alaihā faan

lahū se us ne likhā

lā-ilāha il-lallāh

ba-waqt-e-asr azan gunjti hai sahra mein

namaz KHud hi musalla bichhane aai hai

baDa ajib tha manzar

ajib raat thi wo

hawaen sahmi hui thin charagh chup chup the

har ek samt wahi be-karan si KHamoshi

faza udas

wahi nim-jaan si KHamoshi

sukut-e-shab mein bhi aahaT thi inqilabon ki

saji thi bazm wahan aasman-janabon ki

bahut si baaten thin aur koi baat thi hi nahin

phir us ke baad koi raat

raat thi hi nahin

wo raat jab bhi kabhi yaad aane lagti hai

to raushni hamein rasta dikhane lagti hai

us ek shab mein murattab hua nisab-e-wafa

likhi gai thi usi raat mein kitab-e-wafa

us ek raat ko tahrir koi kaise kare

KHayal-o-fikr ko zanjir koi kaise kare

lahu ke KHwab ki tabir koi kaise kare

safar tha kaisa wo kaisi masafat-e-shab thi

koi batae to

kaisi wo saat-e-shab thi

mutalibaat-e-shariat bahut ziyaada the

aur us ke pas faqat ek shab ki mohlat thi

us ek shab mein use kitne kaam karne the

use sikhana tha insan ko bandagi ka shuur

tilawaton ka qarina suKHanwari ka shuur

wo ek raat thi aisi

ki qadr-o-isra ne

nazar jo apni jamai to phir haTai nahin

wo regzar ke sine pe nasb ek KHema

lahu se sabr ki tariKH likhne wala tha

bujha bujha sa khaDa tha wo pasban-e-charagh

magar darun mein is ke bahut ujala tha

wo jaanta tha wafadar hain sabhi nasir

wo sar kaTaenge lekin na sath chhoDenge

charag-e-KHema bujhane ka ye na tha maqsad

ki us ko yawar-e-ansar ko parakhna tha

wo raushni mein unhen lana chahta tha faqat

samajh raha tha wo qudrat ke har ishaare ko

sadaen deti rahi us ko daulat-e-duniya

kahan wo sabr kahan jabr-o-shaukat-e-duniya

magar wo ek sada

aasman se aati hui

bata rahi thi

ki kya aasman chahta hai

KHuda-e-pak koi imtihan chahta hai

isi liye koi sahra ki samt baDhta raha

lahu lahu kisi dariya ki samt baDhta raha

wo raushni ki alamat

wo baniyan-e-charagh

samajh raha tha bujhega ye KHandan-e-charagh

ajib log the wo KHandan-e-nur ke log

the sab ke ek se lahje

kalam yaksan the

KHilaf-e-zulm sabhi ke payam yaksan the

bahut hi ghaur se har chehra paDh rahe the husain

ki aane wala har ek lamha paDh rahe the husain

wo ek raat bhi dekho guzar hi jati hai

sawere marka hota hai haqq-o-baatil mein

ajib josh hai jazba hai jaan-nisaron mein

waqar-e-tishna-labi ko gale lagae hue

guzar raha hai qabila lahu ke dariya se

ba-waqt-e-asr azan gunjti hai sahra mein

namaz KHud hi musalla bichhane aai hai

sar-e-husain ada kar raha hai sajda-e-shukr

gulu-e-KHushk pe KHanjar ki dhaar chalti hai

paDha tha jis ne kabhi

kullu man alaiha fan

lahu se us ne likha

la-ilaha il-lallah